Қостанайдағы тігін фабрикасы биылдан бастап қарулы күш құрылымдарына қажетті қорғаныс құралдарын, десанттық парашюттерді шығара бастады. Бұл өнімдер сынақтан өтіп, жоғары бағасын алды. Одан бөлек, жақын арада жастарға арналған күнделікті киім үлгісін тұтынушыларға ұсынбақ.

Елде алғаш рет парашют өндірісі Қостанайда қолға алынып отыр. Сол үшін арнайы цех іске қосылды. Мамандар шетелде оқып, дайындалды. Алғашқы алты парашют сынақтан өтіп, әскерилер тарапынан оң бағасын алды.

Гүлжан Молдағалиева, парашют өндірісінің технологы:

- Парашют өндірісінде аса ыждаһаттылық қажет. Бұл жерде істейтін әр маман жауапкершілікті сезіне білуі тиіс. Сондықтан кадр мәселесіне аса мән беріледі. Біз әскерилерге, құтқарушыларға және жүк түсіруге арналған парашюттер шығарамыз. Жылына 200 парашют жүйесін өндіруді жоспарлап отырмыз.

Раушан Жикенова тігін фабрикасында 45 жыл бойы еңбек етіп келеді. Қарапайым тігіншіліктен бастап, өндіріс басшысы лауазымына дейін көтерілген. Оқ өтпейтін кеудеше, каска, парашют тігу біз үшін таңсық дүние. «Алайда замануи технологияға тез бейімделіп жатырмыз», — дейді шебер маман.

Раушан Жикенова, өндірістік бөлімнің басшысы:

- Қолменен бұрын қайшымен кесеміз. Қайшымен кесіп, дәл қазір ондай жоқ. Қазір бәрі автоматтандырылған. Мысалы, бұрын күніне 100 шығарып отырсақ, 200 шығарып отырсақ, қазір мың, 2 мыңдап сапасы да саны көбейіп келе жатыр.

Биыл фабрика Абу Дабиде өткен халықаралық көрмеге қатысты. Сонда қостанайлық өнімдерге қызығушылық танытқандар аз болмаған.

Әрсен Жетпісбаев, тігін фабрикасының басшысы:

- Географиялық жағынан ТМД елдері жақын десек те, қазір біз негізінен Таяу Шығысқа көз тігіп отырмыз. Түркия, Африка жағына шықпақ ойымыз бар. Нақты тапсырыстар да жоқ емес. Үндістанмен белсенді түрде келіссөздер жүргізіліп жатыр. Парсы шығанағы бойындағы елдермен де байланыс орнатсақ дейміз.

Кәсіпорын әскери күш құрылымдарының тапсырысынан тыс, жастарға арналған күнделікті жеңіл киімдердің отандық брендін ұсынып отыр. Әзірге белгілі дизайнерлердің қатысуымен тәжірибелі түрлері тігілген. «Осындай іскерлік, ізденістің арқасында биыл былтырға қарағанда өндіріс өсімі 30 пайызға жетті», — дейді фабрика басшысы.

Авторлары: Мағауия Қалиев, Сергей Трахтенберг