Күдікті жігіт ауыл тұрғыны болып шықты.
Ордабасы ауданында полицейлер жергілікті тұрғынның 10 бас қойын жайылымнан жымқырды деген күдікпен 21 жастағы жігітті ұстады, деп жазады inbusiness.kz сайты.
Ол күндізгі уақытта көршісінің жайылып жүрген қойларын ұрлаған. Содан ұрлық ізін жасыру мақсатында қойларды көрші ауылға апарып, арзан бағаға сатқан.
Тергеу барысында күдіктінің бұдан бөлек тағы 2 мал ұрлығына қатысы бары анықталды.
Жәбірленушілерге 3 миллионнан астам шығын келген. Полиция қызметкерлері қолды болған ұсақ малдарды аман-есен тауып, заңды иелеріне тапсырды.
Қазіргі таңда күдіктіге қатысты сотқа дейінгі тергеу амалдары жүргізіліп жатыр.
