Қазақ киносының аңыз актёрі Асанәлі Әшімов өмірі мен шығармашылығы туралы сыр шертіп, өміріндегі ең үлкен өкініші туралы айтты. Ол балаларына тәрбие бере алмағанына қынжылды, деп хабарлайды KAZ.NUR.KZ.
Бұл туралы ол "Қазақстан" телеарнасының "1001" түн бағдарламасына берген сұхбатында айтты. Ол өмірден озған балалары Сағи мен Мәди Әшімовтерді еске алды.
"Бір жылы емханада жатқанда таңертең сегізде процедураға баруым керек еді. Ұйықтап қалыппын. Сағидің "аға" деген дауысын естідім. Саңқ ете қалды. Сағатқа қарасам процедураға баратын уақыт болған екен. Оятқаны ғой. Балаларыма тәрбие бере алмадым. Балалар менің інімдей болды. Өйткені шешей тәрбиеледі. Шешем бұларды бала қылды. Мені "аға", Майраны "тәте" деді. Мен олармен қалжыңдасып, құрдас адамдай болдық. Мектебіне барып, сабағына қатысып деген менде болған жоқ. Тең өстік деген сөз ғой. Кейін кеткеннен кейін өкінем ғой. беттерінен ең құрмаса бір рет сүймеппін деп", — дейді ол.
Актёр өміріндегі ауыр сәттерге тоқталып, арнайы кітап жазғанына да тоқтала кетті.
"Өмірді жаңадан баста бастама, не болды сол қалады жүректе. Қазіргі қасымда жүрген жарым барлық жағдайымды жасап жүр. Осы жасқа келмей қалуым мүмкін еді. Өміріме өкпем жоқ. Қаншама қиындық болды. "Жан бөлек" деген кітап жаздым. Олармен бірге кете алмайды екенсің, жаным бөлек. "Тірі адам тіршілігін жасайды". Сәтті отанасы болса, сол үй бақытты. Сәтсіз болса, ол үйде жақсы өмір болмайды", — деп сөзін түйіндеді қазақ киносының "ақсақалы".
Мәтіннен қате тапсаңыз, бізге жазыңыз
