Қазақ тілі Gemini-дің үшінші буынын жаңарту аясында қосылған 23 жаңа тілдің қатарына енді.
Google компаниясы Gemini жасанды интеллект моделін қазақ тілінде іске қосты. Бұл туралы Қазақстан Республикасының Жасанды интеллект және цифрлық даму министрлігі хабарлады.
Қазақ тілі Gemini-дің үшінші буынын жаңарту аясында қосылған 23 жаңа тілдің қатарына енді.
Gemini – Google сервистеріне кіріктірілген, қосымша ретінде де қолжетімді жеке ІІ-көмекші. Ол мәтін жазу, жоспарлау, ақпарат іздеу, сурет жасау және өзге де көптеген тапсырманы орындауға көмектесетін генеративті жасанды интеллектке негізделген смарт чат-бот ретінде жұмыс істейді.
"Қазақстандағы пайдаланушылар Gemini мүмкіндіктерін ана тілінде, әлемдегі ең ірі тілдермен тең дәрежеде қолдана алады", – делінген ресми хабарламада.
Қазіргі таңда Gemini-дің қазақ тіліндегі интерфейсі веб-нұсқада қолжетімді. Пайдаланушылар тілді аккаунт баптаулары арқылы өзгерте алады.
Оқи отырыңыз: Ғалымдар егде жаста мидың жұмысын жақсартудың оңай жолын тапты
Ал Android және iOS мобильді қосымшаларына қолдау көрсету, сондай-ақ Gemini Live тікелей сөйлесу режимін іске қосу кейінірек жоспарланып отыр.
Компания өкілдерінің айтуынша, қазақ тіліндегі нұсқаның іске қосылуы Қазақстанның Тәуелсіздік күніне орайластырылған және бұл елдегі жасанды интеллектті дамытуға бағытталған ауқымды бағдарламаның бір бөлігі.
