Ақтөбе облысының қылмыстық істер жөніндегі мамандандырылған ауданаралық сотында алдын ала тыңдау өткен.
Аса ауыр баппен айыпталған 29 жастағы азаматшаға ҚР Қылмыстық кодекстің 99-бабы 3-бөлігі "Адам өлтіру" бойынша қылмысты жасады деп айып тағылған, деп хабарлайды inbusiness.kz сайты.
Ел естімеген қылмыс 2025 жылдың 23 наурызында болған. Өкініштісі, әйел бұған дейін де балаларын өлтіруге әрекет жасаған. Мұны сотқа жәбірленуші болып келген әйелдің жолдасы, балалардың әкесі айтып берген.
– Бұған дейін де осындай оқиға болды. Оны әйелімнің өзі айтты. Ұйықтап тұрғанмын, ол маған "қызды тұншықтырып тастадым" деді. Сенген жоқпын, мән бермедім. Қыздың бір жақ бетінде нүктелі дақтар қаптап кеткен. Әйелім "таяуда өледі" деді. Қорықтым. Кейін әкесіне, полицияға хабар бердім, – деді жолдасы.
Осылайша, әйелді әкесі Ақтөбедегі өз үйіне алып кеткен. Оқиға сәтінде інісі мен келіні басқа бөлмеде болған.
"Ол соңғы жылдары 2 баланың күтімімен үйде отырды. Жоғары білімді. Мұғалім болды. 2 баланың әруағы үшін емделіп, қоғамға қосылғанын қалаймын. Қазір Талғарда емделіп жатыр", – деді шарасыз әке.
Мемлекеттік айыпталушы күдіктіге қатысты айыптау мәнін баяндады.
– 23 наурыз сағат 13:00 шамасында 2022 жылы қаңтарда туған ұлын, 9 сәуір 2024 жылы туған қызын, яғни 2 немесе одан да көп адамға дәрменсіз күйде жас балаларды қасақана қазаға ұшыратуға бағытталған ой туындаған. Ойын соңына дейін жеткізуді көздей отырып, жатын бөлмедегі жастықпен ұйықтап жатқан балаларын тұншықтырып өлтірген. Жас балалардың мәйітіне тағайындалған сот-медициналық қорытындысында механикалық асфексия деп көрсетілген. Тыныс алу жолдарының, мұрнының, ауызының жұмсақ заттармен қысудан болған. Тыныс алу жолдарына қан құйылған, – деді прокурор Елдар Әбиев.
"Өз балаларын өлтірді" делінген әйел 1996 жылы Байғанин ауданында дүниеге келген. Жоғары білімді. Атырау облысының Сағыз ауылына тұрмысқа шыққан, сол жақта жолдасымен, балаларымен бірге тұрған. Әйел осы күні Алматы облысы, Талғар ауданындағы психикалық емдеу орталығына ем алуда. Сондықтан сотқа қатыспаған.
Әйелге қатысты 24 сәуір 2025 жылы психотерапевттің сараптамасы тағайындалған. Онда күдіктінің депрессиялы параноидты синдром түріндегі созылмалы психикалық бұзылысқа шалдыққаны расталған. Одан өзіне және қоғамға қауіпті факторлар анықталады. Жасаған ісіне жауап бере алмайтындықтан, мәжбүрлі емдеуге жатқызылған.
Басты сот талқылауы 10 маусымға тағайындалды.
