Шымкент қаласында антисанитариялық жағдайда танымал брендтің кофесін дайындаған заңсыз цехтың жұмысы әшкереленді, деп хабарлайды Әділет министрлігіне сілтеме жасаған KAZ.NUR.KZ.
Ведомствоның баспасөз қызметінің мәліметінше, әділет органдары мен полиция департаменті бірлескен жедел тексерістің нәтижесінде цех жұмысы тоқтатылған.
"Тез еритін кофені "С" есімді азамат кәдімгі гаражда дайындаған. Күмәнді сападағы шикізат дайын қаптармен сатып алынған. Анықталған орында тез еритін дайын 3/1 кофені термотігіс арқылы ыдысқа құю, орау және өзге біреудің тауар белгісін жапсыру жұмыстары жүргізілген.
Аталған контрафактілік өнім қаладағы шағын дүкендер мен сауда нүктелері арқылы сатылған. Тексеру нәтижесінде құқық бұзушыдан тауар белгісі бар 4000-нан астам орама бірлігі, сондай-ақ өндіріс жабдықтары (термотігіс, таразы, дайын 3/1 кофенің қаптамасы) тәркіленді", — делінген хабарламада.
Құқық иеленушінің ресми мәлімдемесіне сәйкес, тәркіленген контрафактілік өнім сапа стандарттарына сәйкес келмейді және тұтынушылардың денсаулығы мен өміріне тікелей қауіп төндіруі мүмкін.
Осы іске байланысты азамат "С-ға" қатысты ҚР Әкімшілік құқық бұзушылық туралы кодексінің (ҚР ӘҚБтК) 158-бабы (Өзге біреудің тауар белгісін заңсыз пайдалану) бойынша әкімшілік құқық бұзушылық туралы іс қозғалған.
Тексеру материалдары одан әрі қарау және шешім қабылдау үшін сотқа жіберіледі.
Мәтіннен қате тапсаңыз, бізге жазыңыз
