Қазақстан мен Қатар үкіметтері арасындағы қазақстандық жұмыскерлерді Қатарда жұмысқа орналастыруды реттейтін келісім күшіне енді.
Бұл туралы Еңбек және халықты әлеуметтік қорғау министрлігі хабарлады.
Келісімге 2024 жылғы 14 ақпанда Мемлекет басшысының Дохаға ресми сапары барысында қол қойылған. Ал 2025 жылы құжатты ҚР Парламенті мақұлдап, Президент қол қойды.
Құжат қазақстандық азаматтарды Қатарда қауіпсіз әрі ашық түрде жұмысқа орналастыруды, олардың еңбек және әлеуметтік құқықтарын қорғауды көздейді. Атап айтқанда, тұрғын үй, медициналық қызмет, ұшу шығындары, еңбекақы мен демалыс шарттары еңбек келісімшартында нақты көрсетіледі.
Келісімнің орындалуын қадағалау үшін екі елдің еңбек министрліктері өкілдерінен бірлескен комитет құрылады. Қатардағы барлық ресми бос жұмыс орындары migration.enbek.kz порталында жарияланатын болады.
Айта кетейік, 2025 жылдың 9 айында шетелде 156,7 мың қазақстандық еңбек етіп жүр. Ең көп азамат Ресейде, Корея Республикасында, Польшада және Ұлыбританияда жұмыс істейді.
