Енді обыр дертін ерте анықтап, жаңа әдіспен емдеуге болады.
Тәуелсіздік жылдарында онкологиялық қызмет айтарлықтай дамып, жоғары технологиялы емдеу деңгейіне көтерілді. Соңғы отыз жыл ішінде онкологиялық орталықтар заманауи құрал-жабдықтармен қамтылып, емдеудің озық тәсілдері енгізілді. Соңғы жылдары Семей қаласында ядролық медицина саласы да қарқынды дамып келеді. Қазір дәрігерлер «тераностика» емін қолдануда.
Рүстем Қайратұлы, тілші:
- Тәуелсіздік жылдарында еліміз онкологияны емдеуде жаңа деңгейге көтерілді. Осы есіктің ар жағында радиойодтерапия жүргізіледі. Бұл бірегей орталық 2021 жылдан бері жұмыс істейді. Сол уақыттан бері 2608 адам радионуклеидті терапия алған.
Радиойод терапиясы қалқанша безінде жиналып, қатерлі жасушаларды жояды. Емнің бұл түрінде науқасқа ешқандай операция жасалмайды, жеңіл өтеді.
Қайыржан Құдайбердіұлы, радионуклидтік терапия бөлімінің дәрігері:
- 2021 жылға дейін науқастар шет елге барып ем алатын. Ресейге, Өзбекстанға және Кореяға барып алатын. Қазіргі уақытта 21-жылдан бастап өзіміздің елде алатындай нәтижеге жетті. Радиоактивті йод нысаналы түрде қалқанша безінің ауруларына, сараланған қалқанша безінің рагын да нысаналы түрде соны жояды. Теретоксикоз кезінде қалқанша безінің белсенді клеткаларын басып, нормаға келтіреді.
«Тераностика» емі кезінде адамға арнайы радиоактивті препарат салынады. Соның көмегімен қатерлі ісіктің бар жоғы анықталады. Ал обырды емдеу кезінде сол дәріні қолдану арқылы арнайы терапия жасалады. Ол науқастың жағдайына байланысты бірнеше кезеңге созылуы мүмкін. Емді бастамас бұрын дәрігерлер адамның жағдайын жіті тексереді.
Әйгерім Түсіпжанова, радионуклидтік диагностика бөлімінің меңгерушісі:
- ПЭТ/КТ зерттеуі қуықасты безі қатерлі ісігін ерте анықтауға мүмкіндік береді. Ол ағзадағы метастаздарды, сондай-ақ қуықасты безінің өзін де анық көрсетеді. 2025 жылдың ақпан айынан бастап біз бұл зерттеуді жүргізіп келеміз. Осы уақытқа дейін шамамен 80-ге жуық науқас тексеруден өтті.
Ядролық медицинаның дамуы онкологиялық ауруларды ерте кезеңде анықтауға мүмкіндік береді. Осы арқылы дәрігерлер дертті дер кезінде анықтап адам өмірін сақтап қала алады.
Рүстем Қайратұлы, Мәди Базарбеков
