Ұлттық құндылықтарды ұлықтауды мақсат еткен бұл ауқымды шараға Қазақстанның түкпір-түкпірінен келген шеберлер қатысып, өз қолдарымен жасаған бірегей бұйымдарын көпшілік назарына ұсынды.
Елордада Тәуелсіздік күніне орай Astana Mall сауда-ойын сауық орталығында "Ұлы дала қолөнершілер керуен көші" республикалық жәрмеңкесі өтті, деп жазады inbusiness.kz сайты.
Жәрмеңкеде түйе мен қой жүнінен, киізден, былғарыдан, ағаш пен табиғи тастардан дайындалған сан алуан қолөнер туындылары қойылды. Көздің жауын алатын қолдан тігілген сөмкелер, ұлттық нақыштағы қолға тағатын әшекей бұйымдар, алқа-сырға, білезіктер, сондай-ақ жүннен тоқылған шәлілер, бас киімдер, шұлықтар мен кәдесый заттар келушілердің ерекше қызығушылығын тудырды.
Әр бұйымнан қазақтың дәстүрлі дүниетанымы, көшпелі мәдениетінің ізі, шебердің қолтаңбасы мен ыждаһатты еңбегі айқын байқалады. Ал, ұйымдастырушылар "Ұлы дала қолөнершілер керуен көші" жәрмеңкесі отандық қолөнерді насихаттап қана қоймай, ұлттық мұраны жаңғыртуға, шеберлердің тәжірибе алмасуына және қазақстандықтардың төл мәдениетке деген қызығушылығын арттыруға зор үлес қосатынын айтады.
"Біз қолөнерді дамыту, шеберлерді қолдау бағытында соңғы бес жыл бойы жүйелі жұмыс жүргізіп келеміз.
Мұнда Қарағанды, Қостанай, Қызылорда, Тараз секілді өңірлерден келген 100-ге жуық қолөнерші өз бұйымдарын көпшілік назарына ұсынып отыр. Басты мақсатымыз – отандық қолөнершілердің басын қосу, олардың төл туындыларын кеңінен таныстыру, ұлттық өнердің дамуына серпін беру", – деді ҚР "Хас Шебер" отандық өнімді дамыту қауымдастығының президенті Зиуар Жұманова.
Аталған қолөнер жәрмеңкесі аясында іс-шараға белсенді қатысқан қолөнершілерге арнайы сертификаттар табысталып, құрмет көрсетілді.
