Марқұм оқушының анасы әділдік іздеп жүр.
Қайғылы оқиға оқушылардың сынып ішінде қараусыз қалып, телефонға таласуынан басталған, деп хабарлайды inbusiness.kz сайты.
Мұны қайтыс болған 12 жастағы оқушының анасы айтып отыр. Қылғынып, дем жетпей жатқан марқұмды әуелі сыныптастары су шашып құтқаруға тырысқан.
Айдың-күннің аманында баласынан айырылып қалған Гүлмира Көшеева 7 ақпан күні ұлын сабаққа жіберген. Алайда оны сол күні мұғалімдер мектепке шақырып алған. Ол сынып ішінен қимылсыз жатқан ұлын көріп, ауруханаға жеткізген. Бірақ, ұлының демі мектепте үзілгенін естиді.
– Қасындағы бала мектепке телефон алып барған. Балам оны алып қашқан. Арқасынан қуалап келген де, партада отырған кезде буындырған. Ұзақ буындырған. Кейін бала жерге кұлағанда ешкім келмеген. Мұғалім сабақта болмаған. Оқушылар медбикені шақырмаған, – дейді марқұмның анасы Гүлмира Көшеева.
Әйелдің сөзінше, оқиға кезінде мектеп директорының орынбасары болып жұмыс істейтін пән мұғалімі өз кабинетінде отырған, балалар қараусыз қалған. Ал кезекші мұғалім сыныптағы шуды естіп-көргенімен, назар аудармай өте шыққан.
– Есікті ашып қараса, балалар "Айна апай, Ұлағат құлап қалды, талып қалды" деген екен. Ол есікті қайтып жауып кеткен. Сол уақытта кірсе мұндай жағдай болмас еді. Мұғалімдер маған "баланың жүрегі ауырады, анау-мынау, эпилепсия" деп айтты. Кейін медициналық сарапшының қағазы шықты. Баланың дені сау. Тап-таза, еш жерінде ешқандай ауру жоқ. Өлім себебі буындырған, – дейді баласын жоқтаған шарасыз ана.
Қайғылы жағдайдан кейін директордан бастап, орынбасары және тағы 4 мұғалім жұмыстан кеткен. Десе де, олар көп ұзамай қызметтеріне қайта келу үшін еңбек инспекциясына арыз қалдырған.
Түркістан облысының полиция департаменті әзірге оқиғаға пікір білдірмеген. Белгілісі жайттың бірі сыныптасының өліміне себепші болған оқушының ата-анасына айыппұл салынған.
