Шымкентте 12 жеке сот орындаушысы мемлекеттік лицензиясынан айырылды, деп хабарлайды қалалық прокуратураға сілтеме жасаған KAZ.NUR.KZ.
Шымкент қаласының прокуратурасы тексеру нәтижесінде жеке сот орындаушыларының (ЖСО) борышкерлердің Қазақстан Республикасынан шығуына бұрын қойылған шектеулерді заңсыз алып тастау және атқарушылық іс жүргізуді заңсыз қозғау фактілерін (ЖСО еңбек демалысында болған кездерінде, олардың көмекшілері атқарушылық іс жүргізуді қозғаған) анықтаған.
Қазақстан Республикасы Әділет министрінің атына заңдылықты бұзушылықтарды жою туралы ұсыныс енгізілген.
Ұсынуды қарау нәтижесінде 85 ЖСО тәртіптік жауаптылыққа тартылып, сонымен қатар жеке сот орындаушысы қызметімен айналысу құқығына берілген мемлекеттік лицензиясынан (бұдан әрі – лицензия) айыру туралы сотқа талап қою енгізілген.
Әділет министрлігінің талап қоюы қанағаттандырылып, 12 ЖСО лицензиясынан айырылған. Сот актісі күшіне енді.
Прокуратура органдары атқарушылық іс жүргізудің заңдылығын қадағалауды тұрақты негізде жүзеге асырады және бұзушылық фактілері анықталған жағдайда оларды жою және кінәлі тұлғаларды жауаптылыққа тарту жөнінде шаралар қабылдайды.
Мәтіннен қате тапсаңыз, бізге жазыңыз
