Джеки Чан Маңғыстауды жаңа фильмінің түсірілім алаңы ретінде таңдады.
Әлемге әйгілі голливудтық актёр әрі режиссёр Джеки Чан Қазақстанда жаңа блокбастер түсіруді жоспарлап отыр. Бұл туралы Маңғыстау облысы әкімдігі хабарлады.
Аталған мәліметке сүйенсек, Джеки Чан және "Құдайдың сауыттары: Ультиматум" фильмінің режиссёры Роберт Кун Маңғыстауды өздерінің жаңа ірі киножобасының негізгі локациясы ретінде ресми бекіткен.
Киножоба өкілдері өңірге арнайы келіп, табиғи және инфрақұрылымдық мүмкіндіктермен танысты. Олар ондаған ықтимал локацияларды аралап, өңірдің бірқатар бірегей табиғи нысандарын егжей-тегжейлі қарап шыққан. Ұзақ талқылаулардан кейін Маңғыстаудың ерекше ландшафттары, кең панорамалары және табиғи болмысы түсірілімге ең қолайлы орын ретінде таңдалған.
Әкімдіктің мәліметінше, аты аңызға айналған фильмнің Маңғыстауда түсірілуі — қазақстандық киноиндустрия үшін аса маңызды оқиға. Жоба Қазақстанның халықаралық кинематография картасындағы орнын нығайтуға, өңірге инвестиция тартуға, сондай-ақ креативті индустриялар мен туризмді дамытуға серпін береді.
Оқи отырыңыз: Әлемдік киножұлдыз Қазақстанда: Джеки Чан түсірілім алаңдарын таңдады
Халықаралық деңгейдегі кино мамандарының қатысуы жергілікті кадрлар үшін кәсіби тәжірибе алмасуға мүмкіндік жасап, Маңғыстаудың табиғи және мәдени мұрасын әлемдік аудиторияға кеңінен танытуға сеп болады. Жоба бойынша дайындық және ұйымдастыру жұмыстары белгіленген тәртіппен жалғасады.
