Оның орнына жарық инсталляциясын, LED-иллюминация мен дрон-шоуды қолдану ұсынылды.
Қырғызстанның Табиғи ресурстар министрлігі мемлекеттік органдарды Жаңа жылдық отшашудан бас тартуға шақырды, деп хабарлайды inbusiness.kz сайты жергілікті БАҚ-қа сілтеме жасап.
Мұндай шешімнің қабылдануына пиротехникалық құралдардың ауаға кері әсер ететіні себеп болып отыр. Қыс мезгілінде ауа температурасының инверсиясына байланысты зиянды заттардың шоғырлануы күрт артады делінген.
Бұдан бөлек отшашулардың қатты тұрмыстық қалдықтардың көлемін көбейтіп, өрт шығу қаупі туындайтыны айтылған.
Қырғызстанның Табиғи ресурстар министрлігі қоршаған ортаға зиян келтірмейтін, отшашуларға балама ретінде жарық инсталляцияларын, LED-иллюминациялар мен дрон-шоуларды қолдануға болатынын атап өтті.
"Осыған байланысты министрлік уәкілетті мемлекеттік органдарды, қала әкімдіктері мен жергілікті атқарушы органдарын биылғы мереке кезеңінде отшашулардан бас тартуды қамтамасыз етуге шақырады", – делінген хабарламада.
