KIMEP университетінің 22 жастағы түлегі Ақнәр Хамиттің өліміне қатысты іс әлі де соңына жетпеді. Ақнәр Хамиттің анасы Гүлстан Хамит әділдік іздеп жүргенін айтып, тағы бір мәрте үндеу жасады, — деп хабарлайды Massaget.kz тілшісі.
Гүлстан Хамит журналист Жанар Байсемізге берген сұхбатында іс созбалаңға салынып кеткенін айтты.
"Қызымның өліміне байланысты бір жарым жылдан бері қарай әділет іздеп, шарқ ұрып жүрген анамын. Бармаған есігім, жазбаған шағымым, көріспеген адамым қалмады. Бірақ күні бүгінге дейін іс созбалаңға салынып келеді. ...Қызымның бас бармағы түбімен жұлынған. Денесінде қылғындырған із бар. Білегін тістеген. Үлкен дене жарақаттары болған", — дейді ол.
Марқұмның анасының айтуынша, сол күні қасында болған екі қыз Ақнәрдің бұрынғы істерін қазбалап, қаралағысы келген.
"Маған қызымның ар-ожданын ақтап алу керек. Ол өз-өзін өлтірген жоқ, кісі қолынан кетті. Ап-анық көрініп тұр", — деді ол.
Айта кетейік, 2024 жылғы шілдеде Ақнәр Хамит көпқабатты үйдің терезесінен құлап, ауыр жарақаттан қаза тапты. Марқұмның туыстары оның өзіне қол жұмсағанына сенбейді. Бұған дейін істі ҰҚК тергеп жатқаны айтылды.
Өзекті жаңалықтарды өз уақытында оқу үшін Facebook парақшамызға жазылыңыз!
