40 жастағы футболшы енді қай клубқа барса да, әлем назарында болары сөзсіз.
Бүгін, 29 мамыр Сауд Арабиясының әйгілі футбол клубы "Аль-Наср" баспасөз мәслихатын өткізіп, португалиялық аңыз ойыншы Криштиану Роналдудың командадан кететінін ресми түрде мәлімдейді. Мәслихат Астана уақытымен 16:00-де басталады. Бұл шара тек Роналдудың қоштасуымен шектелмей, клуб құрылымында орын алатын ауқымды өзгерістерге де арналмақ.
Ақпан айында 40 жасқа толған Криштиану Роналду "Аль-Наср" сапындағы үшінші маусымын аяқтады. Жеке көрсеткіштері керемет. Ол соңғы маусымда 25 гол соғып, жалпы есепте 111 матчта 99 голмен көзге түсті. Алайда оның жанкешті ойынына қарамастан, команда Сауд Арабиясы чемпионатын тек үшінші орынмен аяқтап, бірде-бір трофейге қол жеткізе алмады.
Маусымның соңғы кездесуінде "Аль-Фатехке" қарсы (2:3 есебімен жеңілген) алаңға шыққан Роналду ойыннан кейін әлеуметтік желіде:
"Бұл тарау аяқталды. Ал оқиға жалғасуда. Баршаға алғысым шексіз", — деп жазды Роналду.
Бұл жазба оның "Аль-Насрдағы" кезеңімен қоштасуының айқын белгісіне айналды.
Роналдудың келесі бағыты әлі белгісіз. Бірақ футбол әлемінде болжам көп. Ең басты нұсқалардың бірі — тағы бір саудиялық гранд "Аль-Хиляль". Бұл клуб 14 маусымда АҚШ-та басталатын ФИФА клубтық әлем чемпионатына қатысады. Сонымен қатар, Бразилияның "Палмейрас" пен "Фламенго" секілді клубтары да шабуылшыға қызығушылық танытып отыр.
Ресми мәлімдемелер болмағанымен, Криштианудың "Аль-Насрмен" қош айтысуы жаңа кезеңнің басталуының жаршысы іспетті. 40 жасында да биік белестерден түспеген Роналду қайда барса да, әлем назарында болары сөзсіз. Енді футбол жанкүйерлері оның келесі қадамын тағатсыздана күтуде.
