Ж. Шанин атындағы академиялық қазақ драма театрында өткен «Мен елімді жырлаймын» атты республикалық айтысқа 14 өңірден үміткерлер қатысты, деп хабарлайды Egemen.kz.
Байқау аясында жас өнерпаздар «Қаратау» дәстүрлі өнер мектебінде белгілі айтскерлермен жүздесіп, шеберлік сыныбынан өтті. Танымал айтыскерлер қатарында Анар Жаппарқұлова, Өміржан Көпбосынов, Біржан Байтуов пен Нұрлан Есенқұловтар болды. «Қаратау» дәстүрлі өнер мектебі жастарды айтыс өнеріне де баулиды. Жақында осы өнер ордасының жас шәкірті «Қола домбыра» айтысында жеңімпаз атанды.
Жыр сайысында республикаға белгілі айтыскерлер Серікзат Дүйсенғазы, Бекарыс Шойбеков, Жансая Мусина, Өміржан Көпбосынов, Анар Жаппарқұловалар қазылық етті.
Іс-шараның ашылу салтанатында сөз сөйлеген С.Дүйсенғазы:
«Мұхтар Әуезов айтқандай, «Айтыс – дала театры», байқауда оқушылардың сөз өнері ғана емес, сахнада өзін-өзі ұстау мәдениеті мен актёрлік шеберліктері де сынға түседі» деді.
Жыр додасында жарып шыққан жас айтыскерлерге 1 млн мен 300 мың теңге арасында қаржылай сыйлықтар берілді. Бас жүлдені шымкенттік Айша Бақтияр иеленсе, бірінші орынды Қостанайдан келген Нұрислам Рагат жеңіп алды. Екінші орынға түркістандық Мейіржан Болат пен астаналық Айғаным Мақсұтқан ие болды. Ал, үшінші орын Шымкенттен қатысқан Ислам Әли мен Қызылорда облысынан келген Шыңғысхан Қарынбайға бұйырды. Екі жас ақынға арнайы жүлделер берілсе, қалған сегіз жас ақынға ынталандыру сыйлықтары табысталды.
Шымкент
