Алматы тұрғындары әлеуметтік желіде жаңбырдан кейін киімде қалған қара даққа шағымданды. Қалалық экология департаментінің өкілі мұның себебін түсіндірді, деп хабарлайды KAZ.NUR.KZ.

Threads әлеуметтік желісінің қолданушысы жаңбырдан кейін киімінде қалған қара дақтарды кетіре алмағанын жазды.

"Мұндайды бірінші рет көріп тұрмын. Кофтамдағы қара дақтарды жуып кетіре алмадым", — деп жазды автор.

Постқа пікір қалдырған басқа да қала тұрғындары осындай мәселеге тап болғанын жазған.

Посмотреть в Threads

Мұның себебін білу үшін NUR.KZ тілшісі Алматы қаласының экология департаментіне жүгінді.

Департамент басшысы Дінмұхамед Лесбековтің түсіндіруінше, киімде қалған қара дақтың пайда болуына атмосферада ұзақ уақыт бойы жиналған күйе мен шаң себеп. Бұл – Алматы ауасындағы ластаушы заттар деңгейінің жоғары екенін көрсететін индикатор.

"Кейінгі апталарда Алматы қаласында жауын-шашынның болмауы салдарынан атмосферада ластаушы заттар (шаң-тозаң, күйе бөлшектері, автомобиль және өндірістік шығарындылар) әдеттегіден көп жиналып қалған. Желсіз әрі инверсиялы ауа райы бұл бөлшектердің төменгі қабатта тұнып қалуына әсер етті.

Кеше жауған жаңбыр алғашқы "тазарту жаңбыры" ретінде атмосферадағы осы жинақталған бөлшектерді жерге шайып түсірді. Мұндай кезде жаңбыр тамшылары ауадағы күйе мен шаң бөлшектерін өзіне жабыстырып, жерге түсіреді. Соның нәтижесінде ашық түсті киімдерде, терезелерде немесе көліктердің үстінде қара түсті дақтардың қалуы – қалыпты физикалық құбылыс", — деді Дінмұхамед Лесбеков.

Оның айтуынша, бұл құбылысты "лас жаңбыр" немесе "күйе араласқан жаңбыр" деп атауға болады.

"Ол жаңбырдың химиялық уыттылығын білдірмейді, бірақ ауада зиянды бөлшектердің (әсіресе PM2.5/PM10 күйе бөлшектері) көп болғанын көрсетеді.

Жаңбыр ауадағы ластағыш бөлшектерді төменге түсіреді – бұл ғылыми тұрғыда дәлелденген "дымқыл тұну" (wet deposition) процесі. Дақтардың пайда болуы көбіне шаң-тозаңның, күйе бөлшектерінің және автокөлік эмиссиясының жаңбырмен шайылып түсуінен болады.

Егер жаңбыр химиялық қауіпті немесе қышқыл сипатта болған жағдайда ерекше иіс, металдың коррозиясы, өсімдіктердің күйюі сияқты белгілер байқалар еді. Қазіргі жағдай оған жатпайды", — деп түсіндірді маман.

Мәтіннен қате тапсаңыз, бізге жазыңыз