Алматының "Қайрат" U-19 командасы УЕФА жасөспірімдер лигасының жалпы кезеңіндегі соңғы турда Грекияның "Олимпиакосын" қабылдап, жеңіске қол жеткізді, деп хабарлайды 1bol.kz.
Ойынның төртінші минутында Рамазан Бағдат қақпаны дәл көздеп, есеп ашты. Үзілістен кейін де алматылықтар басымдығын сақтап, 57-минутта Мұхамедәлі Әбіш тағы бір гол соғып, нәтижені бекітті – 2:0.
Бастапқы құрамда Шерхан Қалмұрза, Данияр Ташпұлатов, Әмірбек Базарбаев, Мұстафа Шен, Адлан Нұрғалиев, Шыңғыс Дүйсенбек, Мухамедәлі Әбіш, Карим Мұхаметжан, Мансұр Бірқұрманов, Әкежан Қалиқұлов және Рамазан Бағдат алаңға шықты.
"Қайрат" U-19 бұл жеңіспен жалпы кезеңдегі алғашқы толық үш ұпайын еншілеп, жарысты төрт ұпаймен қорытындылады. Бұған дейін жастар командасы Португалия, Испания, Кипр және Италия жастарынан жеңіліп, Дания клубымен тең түскен еді.
Айта кетейік, бүгін, 9 желтоқсанда елорданың "Астана Арена" стадионында УЕФА Чемпиондар лигасы аясында алматылық "Қайрат" грекиялық "Олимпиакосқа" қарсы ойнайды. Матч сағат 20:20-да Qazaqstan телеарнасынан тікелей эфирде көрсетіледі.
Мәтіннен қате тапсаңыз, бізге жазыңыз
