Астана қаласында еліміздегі техникалық және кәсіптік білім беру жүйесін дамыту, жұмысшы мамандықтардың мәртебесін арттыру және кадрлар даярлау сапасын жетілдіру мақсатында «WorldSkills Kazakhstan 2025» кәсіби шеберліктің X мерейтойлық республикалық чемпионаты өтті.
Оқу-ағарту министрлігінің ұйымдастыруымен өткен іс-шарада еліміздің барлық өңірінен 825 қатысушы және 719 эксперт бақ сынады. Өндірістік, инженерлік, ақпараттық технологиялар, сервис, құрылыс, әлеуметтік қызметтер және креативті индустриялар саласы бойынша 45 құзыреттілік сайыс өтіп, жастардың осы бағыттағы біліктілігін арттырды.
Елімізде «WorldSkills Kazakhstan» жобасы 2015 жылдан бері өтіп келеді. Жобаның Ұлттық операторы – «Talap» КеАҚ, ол Қазақстанның атынан «WorldSkills International» және «WorldSkills Europe» ұйымдарында өкілдік етеді.
Мемлекет басшысы Қасым-Жомарт Тоқаев Қазақстан халқына Жолдауында еліміздің кадрлық әлеуетін біртіндеп арттыру өте маңызды екенін атап өткен болатын. Еліміз үшін қазіргі сәтте болашақта сұранысқа ие болатын кәсіптер үшін білікті мамандар даярлауды мықтап қолға алу керек екені сөзсіз. Сондай-ақ Президент сапалы білім беру мәселесіне ерекше тоқталды. Мемлекет басшысының айтуынша, қоғамда еңбекқорлық, кәсібилік сияқты қасиеттер өте жоғары бағалануы тиіс. Өз кәсібін жетік меңгерген мамандар ұлт сапасын арттыруға күш қосады. Аталған чемпионат техникалық және кәсіптік білім беру жүйесін дамыту, жұмысшы мамандықтардың беделін арттыру және кадр даярлау сапасын жетілдіру мақсатында жыл сайын дәстүрлі түрде өткізіліп келеді.
Чемпионаттың ашылу салтанатында сөз сөйлеген Оқу-ағарту вице-министрі Шынар Ақпарова Мемлекет басшысының тапсырмасымен елімізде еңбек адамының қоғамдағы мәртебесін арттыру, техникалық және кәсіптік білім саласын трансформациялау бойынша ауқымды жұмыстар жүргізіліп жатқанын айтты.
«Еліміздің болашағы үшін жас мамандарға серпін беріп, әлеуетін арттыру мақсатында ұйымдастырылып отырған бұл сайыстың берері мол. Биылғы Жұмысшы мамандықтар жылы техникалық және кәсіптік білім саласын жаңа деңгейге көтерген ерекше жыл болды. «WorldSkills» қозғалысы осы міндетті жүзеге асыратын жобаға айналды. Әлемдік тәжірибе бұл бастаманың миллиондаған жас маманның тағдырын өзгертетінін дәлелдеп келеді. «WorldSkills» – білім, дағды, табандылық сыналатын үлкен сын. Бұл – отандық кәсіптік білім беру саласын әлемдік стандартқа жақындатқан реформаның катализаторы», деді вице-министр.
Аталған шеберлік сайысына Ақтөбе, Алматы, Атырау, Шығыс Қазақстан облыстарының жастары қатысты. Шындығында, әрбір жетістік – тек жеке қатысушының табысы ғана емес, еліміздің кәсіби шеберлік деңгейінің көрсеткіші. «WorldSkills Kazakhstan» елімізде кәсіби стандарттарды жаңартуға, техникалық және кәсіптік білім беру жүйесін дамытуға, жұмыс мамандықтарының беделін көтеруге айтарлықтай үлес қоса бермек.
«WorldSkills» қозғалысының еліміздегі онжылдығын атап өту – осы шараның басты мақсаты. Осы он жыл ішінде мықты кәсіби қауымдастық құрылып, студенттер, тәлімгерлер және сарапшылар бірігіп, шеберлікті дамытуға, халықаралық стандарттарға сәйкес кәсіби деңгейді көтеруге мүмкіндік алды. Бұл онжылдық болашақ ұрпаққа шабыт беріп, кәсіби білім мен шеберліктің мәртебесін көтеруге негіз бола алады. Бір сөзбен айтқанда, «WorldSkills» – адалдыққа, сыйластыққа, кәсібилікке және шеберлікті жетілдіруге негізделген қозғалыс.
