Ішкі істер министрі Ержан Сәденов Алматыға жұмыс сапары кезінде жеке құрам алдын сөз сөйлеп, жылды қорытындылады. Ведомство басшысы Алматыда қылмыс деңгейі азайғанын атап өтті, деп ІІМ ресми сайтына сілтеме жасаған KAZ.NUR.KZ хабарлайды.
Министрлік басшысы департаменттің жеке құрамы және Ұлттық ұланның өңірлік қолбасшылығымен жедел кеңес өтті. Сәденов жедел-қызметтік жұмыс қорытындыларын шығарып, алдағы уақытқа басым бағыттарды белгілеп, ПД бастығының, Ұлттық ұлан өңірлік қолбасшысының және басқа да қызмет басшыларының есептерін тыңдады.
"Алматы — елдегі ең ірі мегаполис. Алматылық полиция қызметкерлерінің кәсібилігі миллиондаған тұрғындар мен қала қонақтарының қауіпсіздігі мен тыныштығына тікелей әсер етеді", — деді министр.
Оның айтуынша, қалада қылмыспен күрес бойынша кешенді шаралар қабылданған, бұл өз нәтижесін көрсетуде: қылмыс деңгейі 13%-ға төмендеген, кісі өлтіру, ауыр дене жарақатын келтіру, ұрлық, алаяқтық, тонау, қарақшылық, рецидив және көше қылмыстары да айтарлықтай азайған.
Сондай-ақ ІІМ басшысы қоғамдық тәртіпті сақтау мәселесіне ерекше назар аударды. Ол патрульдік полиция, әскери жасақтар және кешенді күштердің кәсіби деңгейін арттыру міндеттерін жүктеп, басты қағидат ретінде сыпайылық пен талапшылдық сақталуы тиіс екенін айтты.
"Заң мен тәртіп — бұл жай ұран емес, қалыпты өмірдің негізі. Әрбір азамат қауіпсіз елде өмір сүргісі келеді. Бұл — біздің күнделікті жұмысымыз. Бірақ көп нәрсе азаматтардың саналы әрекетіне де байланысты", — деді Ержан Сәденов.
Министр өңірлік бөліністердің жұмысындағы кейбір кемшіліктерге тоқталып, профилактикалық жұмысты күшейту, азаматтардың өтініштерін сапалы және уақтылы қарауды қамтамасыз ету, сондай-ақ ішкі істер органдарының тиімділігін арттыратын цифрлық шешімдерді енгізуді жалғастыру бойынша нақты тапсырмалар берді.
Мәтіннен қате тапсаңыз, бізге жазыңыз
