ҚР Энергетика министрі Ерлан Аккенженов 2025 жылғы 29 мамырда Astana International Forum мінберінде газ бағасының көтерілуіне пікір білдірді, деп хабарлайды Zakon.kz тілшісі.
Министрдің айтуынша, баға көтерілімі алдымен көтерме жеткізушілерге қатысты.
"Газдың түпкілікті бағасына келер болсақ – бұл мәселе Энергетика министрлігіне емес, ең алдымен монополиялар мен бәсекелестікті реттеуге жауап беретін Ұлттық экономика министрлігіне қарайды. Сондықтан бұл сұрақ бойынша алдымен сол ведомствоға жүгінген жөн. Ал егер көтерме жеткізушілер туралы айтатын болсақ, бұл бағаның көтерілуі олардың қаржылық тұрақтылығын арттыру мақсатында жоспарланған. Бірақ біз бәріміз жақсы білеміз: көтерме жеткізушілер газды кейін бөлшек сауда арқылы сатады. Демек, бұл кез келген жағдайда түпкілікті бағаға әсер етеді. Сұйытылған және тауарлық газға келсек – бұл Қазақстанда өте маңызды мәселе", – деді Ерлан Аккенженов.
БАҚ өкілдері бұл бағаның көтерілуі халықтың наразылығына себеп болмай ма деп сұрады.
"Мен бүкіл халықтың атынан сөйлей алмаймын. Бірақ түсіндіру жұмыстары министрліктер тарапынан жүргізіліп жатыр, жүргізілді және алдағы уақытта да жүргізіледі. Бұл – "ҚазТрансГаз" ұлттық операторының экономикалық бейтараптығына қол жеткізу үшін қажетті шара. Ресейде "Газпром" – халықтың игілігі дейді. Онда "ҚазТрансГаз" неге біздің ұлттық игілігіміз бола алмайды? Ол да күн сайын Қазақстанды көгілдір отынмен қамтамасыз етіп отырған газ компаниясы. Әрине, оны да қорғау керек. Бірақ мына нәрсені түсінуіміз керек: біз елді тегін газбен қамтамасыз ете алмаймыз. Егер "ҚазТрансГаздың" осы көгілдір отынды өндіруге қанша инвестиция салып жатқанын білсеңіздер, бұл едәуір шығын екенін көрер едіңіздер. Бұл – аз шығын емес. Егер біз сенімді газ көзі болсын десек, үлкен инвестициялар қажет екенін түсінуіміз керек", – деп толықтырды Ерлан Аккенженов.
Министр қазіргі таңда ішкі нарыққа газ жеткізу өзіндік құнынан төмен бағамен жүзеге асырылып жатқанын атап өтті.
