«Мичурин бағы» ашылды

Жоба еліміздің аграр­лық сек­торының ғы­лыми-білім беру әле­уетін нығайтуға, отандық селек­циялық бақ шаруашылығын да­мытуға, өңірдің азық-түлік қа­уіпсіздігін арттыруға бағыт­талған.

Халықаралық маңызға ие ша­ра­ның салтанатты ашылуына Пре­зидент жанындағы Ұлт­тық ғылым акаде­мия­сының пре­зиденті Ақылбек Күрішбаев, Ресей Ғылым академиясы вице-пре­зиденті Пётр Чек­марёв, Ал­маты облысы әкі­мі­нің орынбасары Бақытнұр Бақыт­ұлы, сала ғалымдары мен бау-бақша бизнесінің өкілдері, жетекші аграрлық жоғары оқу орындары мен ғы­лыми зерттеу институттарының басшылары қатысты.

«Мичурин бағы» бірнеше бағытты біріктіретін көпфунк­ционалды, бірегей алаң болады. Мұнда биоресурстық коллек­ция мен дақылдардың гене­тикалық қорының кеңеюі, же­міс-жидек дақылдарының жаңа бола­шағы бар сорттарын зерттеуге, бейімдеуге, екіншіден, ресурстарды ұтымды пайдалана отырып, жоғары тауарлық өнім алуға мүмкіндік беретін жоғары интенсивті технологияларды енгізу мүмкіндігі жасалады.

– Жоба – еліміздің жеміс ша­рушылығы саласын дамытуға жасалған ұзақмерзімді инвестиция. Бақтың жалпы аумағы 3 гектарды құрайды, бүгін алғашқы көшеттер отырғызылады. Бұлар – жоғары өнімді, стрестік фак­торларға төзімді, еліміздегі гено­фондты кеңейтіп, жаңа селек­циялық бағдарламалар жасауға мүмкіндік беретін сорттар. «Ми­чурин бағында» интенсивті бақ шаруашылығының әдістері, су, энергия, ресурс үнемдейтін технологиялар пысықталады. Бола­шақта бұл алаң сапалы шикі­зат­тың тұрақты базасына айналып, шырындар мен концентрат­тардан бастап функционалды тағам өнімдеріне дейінгі терең қайта өңдеуге жол ашады. Яғни, бұл бақтағы әрбір көшет – шикі­заттық модельден ғылымға, бәсекеге қабілетті өнім өндіруге негізделген, – деді ҰҒА президенті А.Күрішбаев.

«Агропищепром» ғылыми-өндірістік орталығының атқарушы директоры С.Колесников: «Баққа тек дәстүрлі емес, сонымен қатар алма, жеміс-жидек дақылдарының ең жаңа өнеркәсіптік сорттары егілді», – дей келе, баққа отыр­ғызылған ресейлік жеміс-жидек дақыл­дарының сорттары туралы баяндап өтті.

Ресейлік серіктестермен, атап айт­қанда, «Сириус» Инновациялық ғылы­ми-технологиялық орталығымен, «Агро­пищепром» ғылыми-өндірістік орталы­ғымен, И.Мичурин атындағы Федерал­дық ғылыми орталықпен бір­лесіп, еліміз­дің жағдайында өсі­руге қолайлы, жоғары өнімді, коммерциялық тиімді сорттар­­дың тәжірибелік учаскелері қалып­тас­тырылатын болады. «Мичу­рин бағында» қысқы, жоғары өнім­ді, ірі жемісті «Нестеров жа­ды» алмасы, экологиялық төзім­ділігі жо­ғары, ауруларға шы­дамды «Ника» алмұрты, климатқа жоғары төзім­ді­лігі бар өнімді сорт «Зареч­ная» қара­өрігі мен хош иісті «Суламифь» таңқурайы орналасады.

Негізгі дақылдардан бөлек, бақта селекция үшін бірегей алмұрт, шие, тәтті шие, өрік сорттары, сондай-ақ балжидек, қара және түрлі-түсті қарақат, қарлыған, қара шетен, теңіз шырғанағы, ирга, қызыл ырғай, итмұрын сияқты кең спектрлі жидектер, нишалық дақылдар отырғызылады.

Бұл бақ – ресурстарды барынша тиімді пайдалану кезінде көпжылдық екпелердің жоғары өнімділігін қам­тамасыз етуге, өнімнің тауарлық сипаттамаларын жақсартуға бағытталған заманауи жоғары интенсивті бақтың үлгісіне айналады.

«Мичурин бағы» ашық аспан ас­тындағы табиғи зертханаға айналып, мұнда отырғызу материалы мен отырғызу сұлбасын таңдаудан бастап, жоғары сапалы жемістерді тұтынушыға жеткізу жүйесіне дейінгі ғылымға негізделген технологиялар пысықталып, енгізіледі.

Бақтың бастапқы кезеңінде қатаң селекциялық талаптарды, жергілікті климатты ескере отырып, бір гектарға 570 ағаш, 200 бұта отырғызу көзделген.

Алматы облысы