Қазақстан мен Франция ирригация және су ресурстарын сақтау салаларындағы ынтымақтастықты күшейтеді.
Екі ел арасындағы инвестициялық әріптестіктің осы және өзге де негізгі бағыттары бүгін Парижде өткен Қазақстан–Франция Іскерлік кеңесінің 14-отырысында талқыланды. Жиынға Қазақстанның салалық мемлекеттік органдарының өкілдері, өңір әкімдері, сондай-ақ отандық және француз бизнес-қоғамдастығының мүшелері қатысты. Өнеркәсіп және құрылыс министрі Ерсайын Нағаспаевтың айтуынша, биылғы 10 айда негізгі капиталға құйылған инвестициялар 13,5 пайызға артып, 13 триллион теңгеден асқан. Бүгінде Қазақстанда 270-тен астам француз компаниясы тиімді жұмыс істеп келеді. Екі елдің экономикалық және инвестициялық әріптестігі тек шикізаттық бағыттармен шектелмей, жоғары технологиялық салаларды да кеңінен қамти бастады. Олардың қатарында: көлік, цифрландыру, жасанды интеллект, су ресурстары бар. Еске сала кетейін, былтыр қарашада Президент Тоқаевтың Францияға мемлекеттік сапары барысында Астана мен Париж 36 келісімге қол қойған болатын. Бүгінгі Іскерлік кеңес қабылданған уағдаластықтарды нақтылап, әріптестіктің жаңа бағыттарын айқындауға арналған бірлескен алаңға айналды.
Айдан Кәрібжанов, Қазақстан — Франция іскерлік кеңесінің тең төрағасы:
- Қазақстан — Франция Іскерлік кеңесі құрылғанына шамамен 20 жыл болды. Оның құрамына энергетика, көлік, инфрақұрылым салаларындағы ірі қазақстандық және француз компаниялары кіреді. Жаңа бағыттар бойынша, әсіресе су ресурстарына қатысты мәселелер қазір өте өзекті. Француз компаниялары тарапынан үлкен қызығушылық бар, бұл тақырып – биылғы отырыстың ерекшелігі. Француз технологияларын трансферлеу және оларды Қазақстанда осы салада пайдалану екі тарап үшін де өзара тиімді болады деп ойлаймын.
