Мемлекет басшысы 2025 жылғы 29 маусымдағы Астана халықаралық форумының пленарлық отырысында сөйлеген сөзінде Біріккен Ұлттар Ұйымы төңірегіндегі мәселелерге тоқталды, деп хабарлайды Zakon.kz.
Президент БҰҰ-ның Қауіпсіздік Кеңесі жайында сөз қозғады.
"Әйтсе де БҰҰ-ның негізгі тармақтары, әсіресе, Қауіпсіздік Кеңесі мүлдем өзгерген жоқ. 80 жыл бұрын жасалған институционалды құрылым мен қазіргі заман арасында алшақтық көп. Бұл Ұйымға және оның тиімділігіне деген сенімге селкеу түсіреді",- деді ол.
Оның айтуынша, миллиардтаған адамның тағдырына әсер ететін аса маңызды шешімді бірнеше елдің қабылдағаны дұрыс емес.
"Сондықтан Қазақстан БҰҰ Қауіпсіздік Кеңесінің құрамын кеңейтіп, оған әлемнің әр өңірінен өкіл қосу туралы ұстанымды қолдайды. БҰҰ өзектілігін жоғалтпай, қазіргі заманның талаптарына сай болуы үшін Қауіпсіздік Кеңесіне құрылымдық реформа жасалуға тиіс". Қасым-Жомарт Тоқаев
Мемлекет басшысының сөзінше, алпауыт елдер бейбітшілік пен қауіпсіздікті сақтауға бейіл екенін анық білдіруі керек.
"Әрі барлық мемлекеттің территориялық тұтастығын қорғау туралы ең басты қағидаттан айнымауға тиіс. Бәріміз БҰҰ Жарғысын мүлтіксіз сақтауымыз қажет. Оның негізгі принциптеріне үстірт немесе немқұрайлы қараудан аулақ болуымыз керек. Сонда ғана Біріккен Ұлттар Ұйымының абырой-беделіне деген сенімді қалпына келтіре аламыз",- деді президент.
Бұған дейін ол Қазақстан экономикасы 2024 жылы жаһандық сын-қатерлерге қарамастан 5,1 пайызға өскендігін айтқан болатын.
