"Байтақ" жасылдар партиясы белгілі қоғам қайраткері Олжас Сүлейменовті Нобель сыйлығына ұсынды, деп хабарлайды партияның баспасөз қызметіне сілтеме жасаған KAZ.NUR.KZ.
Бүгін Алматы қаласында Байтақ" жасылдар партиясы Алматы қалалық филиалының V конференциясы өткен.
Жиында партия төрағасы Азаматхан Әміртаев қазақтың көрнекті жазушысы, қоғам қайраткері және "Невада-Семей" антиядролық қозғалысының негізін қалаушы Олжас Сүлейменовтің кандидатурасын Нобельдің бейбітшілік сыйлығына ресми түрде ұсынғанын жариялаған.
"Бұл бастама – Қазақстанның ғана емес, бүкіл әлемнің тыныштығы үшін аянбай еңбек еткен тұлғаның еңбегін жоғары деңгейде мойындаудың көрінісі. Олжас Сүлейменовтің тарихи рөлі, әсіресе "Невада-Семей" қозғалысы аясындағы қызметі, Семей ядролық полигонын жабуда шешуші фактор болды.
Сонымен қатар оның бастамасы мен Қазақстанның халықаралық деңгейде жүргізген белсенді жұмысының нәтижесінде әлемнің бірнеше мемлекетінде, соның ішінде АҚШ-тың Невада штатында, тағы төрт ірі ядролық полигонның жабылуына жол ашылды. Бұл – жаһандық қауіпсіздікке қосылған ұлы үлес", — делінген хабарламада.
Азаматхан Әміртаев айтуынша, Олжас Сүлейменов – қазақ ұлтының рухани тірегі ғана емес, бүкіл әлемге бейбітшілік үнін жеткізген бірегей тұлға. Сондықтан оның Нобель сыйлығына ұсынылуы – тарихи әділдіктің көрінісі.
Партия өкілдері бұл бастаманың Қазақстанның халықаралық беделін арттыра түсетініне және еліміздің бейбітшілік жолындағы саясатын жаңа деңгейге көтеретініне сенім білдірді.
Мәтіннен қате тапсаңыз, бізге жазыңыз
