ҚМА Қостанай облысы бойынша департаменті заңсыз микроқаржылық қызмет фактісі бойынша сотқа дейінгі тергеп-тексеруді жүргізуде, деп хабарлайды Zakon.kz.
2025 жылғы 29 мамырда таратылған ақпаратқа сүйенсек, күдікті алты жыл бойы тиісті лицензиясыз, "OLX" және "Instagram" мобильді қосымшалары арқылы пайызымен қарыз берумен айналысқан.
"Заңсыз әрекеттер заңды түрінде көрсетіліп, онда нақты берілген сомадан әлдеқайда жоғары сандар көрсетілген. Өйткені оған жылдық 100%-ға дейін алдын ала есептелген сыйақылар енгізілген. Қарыздың қайтарылуын қамтамасыз ету мақсатында қарыз алушылардың мүлкі кепілдікке қойылған. Аталған схема бойынша күдікті жалпы сомасы 556 млн теңгеден асатын 72 мәміле жасаған",- делінген ақпаратта.
Агенттіктің жазуынша, келісімнің бірі Рудный қаласының зейнеткерімен жасалған. Ол күдіктіден емделуге қажет деп 13,2 млн теңге көлемінде қарыз алғаны туралы келісімге отырған.
"Келісім шарттарына сәйкес, зейнеткер екі жыл бойы ай сайын 600 мың теңгеден төлеуге міндеттелген.Алайда, іс жүзінде ол қолына тек 6 млн теңге ғана алған, ал қалған 7,2 млн теңге алдын ала есептелген пайыз ретінде көрсетілген. Қарызды қамтамасыз ету үшін ол өзінің жалғыз пәтерін кепілдікке қоюға мәжбүр болған". ҚМА баспасөз қызметі
Агенттік мұндай ауыр әрі әділетсіз талаптар азаматтар үшін үлкен қауіп тудыратындығын, олар алдану арқылы өз мүлкінен айырылып қалу қаупіне ұшырайтындығын атап өтті.
"Сот санкциясымен күдіктінің жалпы құны 154 млн теңге болатын мүлкіне тыйым салынды. Олардың ішінде 6 жеке тұрғын үй, 3 автокөлік ("TANK 500", "TOYOTA CAMRY", "MITSUBISHI FIGHTER") бар. Тергеп-тексеру жұмыстары жалғасуда". ҚМА баспасөз қызметі
Агенттік ҚР ҚПК-нің 201-бабына сәйкес өзге ақпарат жария етуге жатпайтындығын мәлімдеді.
Бұған дейін Ақтауда кездейсоқ адам суға батып бара жатқан жасөспірімді құтқарып қалғандығы хабарланған болатын.
