Мәжіліс кулуарында денсаулық сақтау министрі Ақмарал Әлназарова ұшақта жолаушыға көмек көрсетіп жатқан сәті бейнеленген видеоға қатысты пікір білдірді. Видео әлеумекттік желілерде таралып, қоғамда қызу талқыға түскен еді, деп хабарлайды KAZ.NUR.KZ.
Журналистер видео әлеуметтік желіде жарияланғаннан кейін көптеген қазақстандық бұл видеоның шынайылығына күмән келтіргенін атап өтті.
Министр, өкінішке қарай күмән келтіріп жатқандар бар екенін жеткізді.
"Бұл көмек көрсеткен бірінші жағдайым емес. Бірақ бірінші рет видеоға түсіріп, әлеуметтік желіге салып жіберген. "Дәрігер бар ма?" деген кезде жүгіріп барып көмек көрсеттім. Менің орнымда болса кез келген дәрігер, медицина қызметкері осылай жасар еді деп ойлаймын. Сондықтан бұл жерде айтарлықтай сұрақ, күмән туындайтын ештеңе көріп тұрғаным жоқ", — деді Ақмарал Әлназарова.
Министр бұл видео пиар үшін түсірілмеді ме деген сұраққа да жауап берді.
"Әркімнің өз пікірі бар. Мен әр адамның пікіріне әсер ете алмаймын. Ең бастысы, өзімнің парызымды орындадым. Ешкімнің алдында ақталғым келмейді", — деді министр.
Мәтіннен қате тапсаңыз, бізге жазыңыз
