Қазақстан Қаржы нарығын реттеу және дамыту агенттігі қарыз алушыларға кредиттерді мерзімінен бұрын өтеу тәртібін назарға ұсынып, несиені ешқандай айыппұлсыз мерзімінен бұрын өтеуге болатынын еске салды, деп хабарлайды KAZ.NUR.KZ.
Агенттік мәліметінше, мерзімінен бұрын өтеу қарыз алушыға пайыздар бойынша артық төлемді қысқартуға және борыштық міндеттемелерді орындауды жеделдетуге мүмкіндік береді. Сіз барлық берешекті толықтай қайтара аласыз немесе белгіленген кестеден тыс соманы енгізу арқылы ішінара қарызды жаба аласыз. Ішінара өтеу кезінде қарыз алушылар кредиттің мерзімін қысқартуды немесе мерзім сақталған жағдайда төлемнің өзін төмендетуді таңдай алады.
Қаржы ұйымдары заңнама шеңберінде мерзімінен бұрын өтеудің ішкі тәртібін, яғни ең төменгі сомаларды, өтініш беру мерзімдерін және есептік күндерді белгілеуге құқылы.
Қарыз алушыларға банкпен қайта есептеу әдісін, қаражатты есептен шығару тәртібін, сақтандыру сыйлықақыларын қайтару ерекшеліктерін және ипотека бойынша ауыртпалықты алу процесін алдын ала келісу ұсынылады.
Осы орайда агенттік мамандары қарызды мерзімінен бұрын өтеу кезінде айыппұл төлемеуге болатынын ескертті.
"Естеріңізге сала кетейік, қаржылық қызметтерді тұтынушылардың құқықтарын қорғауды күшейту мақсатында 2025 жылғы 31 тамызда мерзімінен бұрын өтеу үшін айыппұл санкциялары тек заңды тұлғаларға ғана қолданылатын норма күшіне енді. Жеке тұлғалар кредиттерді кез келген уақытта тұрақсыздық айыбын төлемей, мерзімінен бұрын өтей алады. Бұл норма барлық шартқа, соның ішінде бұрын жасалған шарттарға қолданылады", — деп еске салды агенттік өкілдері.
Мерзімінен бұрын төлемдер борыш жүктемесін азайтады, қаржылық орнықтылықты нығайтады және кредиттік тарихқа оң әсер етеді. Қарыз алушыға мерзімінен бұрын өтеу туралы шешім қабылдағанға дейін өзінің қаржылық резервін және бос қаражатты пайдаланудың ықтимал баламаларын бағалау маңызды.
Мәтіннен қате тапсаңыз, бізге жазыңыз
