Мемлекет басшысы Қасым-Жомарт Тоқаев Алматы облысының әкімі Марат Сұлтанғазиевті қабылдады. Өңір басшысы президентке әлеуметтік-экономикалық сала бойынша есеп берді, деп Ақордаға сілтеме жасаған KAZ.NUR.KZ хабарлайды.

Қасым-Жомарт Тоқаевқа өңірдің негізгі әлеуметтік-экономикалық көрсеткіштері, сондай-ақ Алматы агломерациясын дамыту жоспары жөнінде баяндалды.

Марат Сұлтанғазиев мемлекет басшысына соңғы 3 жылда облыстың жалпы өңірлік өнімі 1,8 есе артып, 3,4 триллион теңгеден 6 триллион теңгеге өскенін айтты.

"Биылғы қаңтар – қазан айлары аралығындағы қысқа мерзімді экономикалық индикатор 109,7 пайызды құрады. Халықаралық компаниялардың қатысуымен тағам өнеркәсібі, логистика және металлургия салаларында жалпы сомасы 470 миллиард теңгеден асатын 13 инвестициялық жоба іске асырылуда", — деді Сұлтанғазиев.

Сондай-ақ өңір басшысы соңғы тоғыз айда өңдеу өнеркәсібінің экспорты 28,5 пайыз ұлғайып, 618,5 миллион долларға жеткені жөнінде мәлімдеді. Оның сөзінше, экспорттың 90 пайызы жоғары деңгейде қайта өңделген өнімге тиесілі.

Оған қоса Сұлтанғазиев Алматы облысы ауыл шаруашылығына арналған мемлекеттік субсидияларды тиімді пайдаланатын жетекші өңірлердің бірі екенін жеткізді. Облыс әкімі бір теңге субсидияға 17 теңгеге дейін ауыл шаруашылығы өнімі өндірілетінін айтты. Сонымен қатар тауарлы сүт фермаларының саны 11-ге дейін көбейгенін хабарлады.

Марат Сұлтанғазиев облыстың әлеуметтік дамуы туралы ақпарат берді.

"Биылғы он айда 950 мың шаршы метрге жуық тұрғын үй салынған. Үш ауысымды мектептер саны 52-ден 28-ге дейін қысқарды", — деді әкім.\

Оған қоса өңір басшысы Қапшағай су қоймасы мен ұлттық табиғи парктер айналасындағы туризм кластерінің даму барысын таныстырды.

"Облысқа келген туристер саны 2,2 миллион адамға жетті. Бұл былтырғы осындай кезеңмен салыстырғанда 36 пайызға артық", — деді Сұлтанғазиев,

Мемлекет басшысы облыс әкіміне өңірдің өнеркәсіп және аграрлық әлеуетін нығайту, логистика, туризм салаларын дамыту, сондай-ақ тұрғындарды толғандыратын өзекті мәселелерді кешенді түрде шешу жөнінде бірқатар нақты тапсырма берді.

Мәтіннен қате тапсаңыз, бізге жазыңыз