Мемлекет басшысы уәдесін орындамайтын, міндетін дұрыс атқармайтын ауыл басшысын қызметінен босату тетіктерін қарастыру қажеттігін айтты. Бұл туралы Ақордаға сілетеме жасаған KAZ.NUR.KZ хабарлайды.
Бүгін ауыл әкімдерінің диалог-платформасында сөз сөйлейген президент "Жергілікті мемлекеттік басқару және өзін-өзі басқару туралы" заңда әкімнің сайлаушылар алдындағы жауапкершілігін нақтылайтын норма жоқ екенін айтты.
"Бұл – дұрыс емес. Әкімдер тұрғындарға сайлау алдындағы бағдарламасының орындалуы туралы жиі есеп беріп тұруға тиіс. Мұны заңмен бекіту керек.
Уәдесін орындамайтын, міндетін дұрыс атқармайтын ауыл басшысын қызметінен босату тетіктері қарастырылуы қажет. Ондай әкімдер халықтың талабымен немесе саяси партиялардың ұсынысымен жұмыстан шығарылуға тиіс", — деді Қасым-Жомарт Тоқаев.
Президенттің айтуынша, сонда әкім болуға үміткерлер де елге экономикалық негізі жоқ құрғақ уәде бере алмайды.
"Мұндай жалаң сөздер, яғни популистік әрекеттер халықтың ауыл әкімдеріне, тіпті тұтас сайлау институтына деген сенімін азайтуы мүмкін.
Үкімет әкімдердің сайлау алдындағы бағдарламасының экономикалық бөлігіне қойылатын талаптарды айқындауы керек. Сапалы дайындалған бағдарламаны аймақтың даму жоспарымен үйлестіруге болады.
Жалпы, осындай шаралар әкімдердің есептілігін күшейтеді. Сондай-ақ өз үміткерлерін ұсынған партиялардың жауапкершілігін арттырады", — деді мемлекет басшысы.
Мәтіннен қате тапсаңыз, бізге жазыңыз
