Павлодар облысында шөп тиеген трактор тіркемесі мен УАЗ көлігі соқтығысып, бір адам қаза болды, деп хабарлайды Sn.kz ақпарат порталы.
Облыстық полиция департаментінің мәліметінше, жол-көлік оқиғасы фактісі бойынша қылмыстық іс қозғады, оның салдарынан жолаушы қаза тапты.
Алдын ала мәліметтер бойынша, 27 қараша күні «Омбы – Майқапшағай» автожолының Аққулы ауылынан 10 шақырым қашықтықта УАЗ маркалы автокөліктің жүргізушісі МТЗ-80 тракторының тіркемесімен соқтығысқан.
«Оқиғаның барлық мән-жайы мен себептері тергеу барысында анықталатын болады.
Полиция департаменті осындай оқиғалардың алдын алу мақсатында жол қозғалысына қатысушыларды жол қозғалысы ережелерін қатаң сақтауға, жылдамдық режимін бұзбауға, әсіресе көлік қозғалысы қарқынды учаскелерде сақ болуға, көлік құралдарының техникалық жағдайын үнемі бақылауға және ауа райының өзгерістерін ескеруге шақырады», – делінген Полиция департаментінің хабарламасында.
