Сыртқы істер министрінің орынбасары Роман Василенко Грекия премьер-министрінің Ұлттық қауіпсіздік мәселелері жөніндегі кеңесшісі Танос Докоспен кездесу өткізді, деп хабарлайды El.kz интернет порталы.
Грек өкілінің Қазақстан елордасына сапары Астана халықаралық форумына қатысуы аясында өтуде. Кездесу барысында тараптар екіжақты ынтымақтастықтың кең ауқымды мәселелерін талқылады. Әсіресе саяси диалогты тереңдету мен сауда-экономикалық байланыстарды дамытуға ерекше назар аударылды.
Р. Василенко екі ел арасындағы достық қатынасты атап өтіп, қазақ-грек серіктестігін одан әрі нығайтудың маңыздылығына назар аударды. Ол Грекияның Қазақстан мен Еуропа одағы арасындағы өзара іс-қимылын кеңейту аясында маңызды орын алатынын айтып, ынтымақтастықты кеңейту үшін айтарлықтай әлеует бар екеніне сенім білдірді.
Өз кезегінде Т. Докос Грекия тарапының Қазақстанмен көпжақты диалогты дамытуға деген ұмтылысын растады. Ол Афинаның экономикалық байланыстарды жандандыруға, көлік байланысын жақсартуға және инвестициялық ынтымақтастықты кеңейтуге мүдделі екенін атап өтті.
Сонымен қатар сұхбаттастар өңірлік және жаһандық күн тәртібіндегі мәселелер бойынша пікір алмасты. Бұл тұрғыда Орталық Азия мемлекеттерімен өзара іс-қимыл шеңберіндегі тиімді серіктестіктің перспективалары айқындалды. Кездесу қорытындысы бойынша тараптар ынтымақтастықты одан әрі нығайтуға дайындығын білдіріп, екі елдің сыртқы саяси ведомстволары арқылы тұрақты байланыстарды қолдап тұру жөнінде уағдаласты.
