26-28 мамыр күндері аралығында Грекия астанасы Афиныда қазақ киносының күндері өтті, деп хабарлайды El.kz интернет порталы.
Іс-шара аясында Мәдениет және ақпарат министрлігі мен «Қазақфильм» ұлттық киностудиясының қолдауымен түсірілген фильмдер грек көрерменіне ұсынылды. Фестиваль бағдарламасына Қазақстан тарихы, мәдениеті мен халық батырлары туралы баяндайтын классикалық және заманауи фильмдер кірді. Кино күндері сақ патшайымы, еркіндік пен батылдықтың символына айналған Томирис туралы тарихи драма «Томирис» фильмінің көрсетілімімен басталды. Бұл туынды фестиваль қонақтары тарапынан қызығушылық тудырды. Сол себепті фильмді Грекияда прокатқа шығару мүмкіндігі туралы келіссөз жүргізіліп жатыр.
Сондай-ақ көрерменге аты аңызға айналған «Дос-Мұқасан» ансамбліне арналған кинотуындысы мен «Қазақфильм» қайта қалпына келтірген қазақ киносының классикасы «Менің атым Қожа» фильмі көрсетілді.
Көрсетілімнен кейін қазақстандық актёрлер мен режиссёрлер және грек киноиндустриясының өкілдері қатысқан шығармашылық кездесулер мен пікірталастар ұйымдастырылды.Фестивальге қатысушылардың пікірінше, мұндай мәдени алмасу шаралары – Қазақстан мен Грекия халықтарының арасындағы өзара түсіністік пен ынтымақтастықты нығайтудың тиімді жолы.
