"Дарын" мемлекеттік жастар сыйлығының иегерлері анықталды. Олардың арасында елімізге танымал спорт және өнер жұлдыздары бар, деп хабарлайды Мәдениет және ақпарат министрлігіне сілтеме жасаған KAZ.NUR.KZ.
Астанада "Дарын" мемлекеттік жастар сыйлығының лауреаттарын марапаттау рәсімі өтті.
Сыйлық мәдениет, ғылым, медиа және спорт саласында жоғары жетістіктерге жеткен 20 жас дарынға табысталды.
Лауреаттар "Ғылым", "Эстрада", "Классикалық музыка", "Халық шығармашылығы", "Спорт", "Дизайн және бейнелеу өнері", "Журналистика", "Қоғамдық қызмет", "Театр және кино", "Әдебиет" номинациялары бойынша анықталды.
2025 жылғы жеңімпаздардың қатарында танымал қазақ әншісі Еңлік Құрарбек (Yenlik), "Славян базары-2024" халықаралық вокалдық байқауының бас жүлдегері Ерназар Жұбан, "Қайрат" футбол клубының шабуылшысы Дастан Сәтпаев, танымал виолончелист Бағжан Октябрь, бокстан екі дүркін әлем чемпионы Аида Әбікеева бар.
"Дарын" мемлекеттік жастар сыйлығы жыл сайын талантты жастарды мемлекеттік деңгейде қолдау мақсатында табысталады. Сыйлық ғылыми, шығармашылық, қоғамдық қызметтегі жетістіктер мен жоғары спорттық нәтижелер үшін беріледі.
"Дарын"-2025 мемлекеттік жастар сыйлығының иегерлері
Мәтіннен қате тапсаңыз, бізге жазыңыз
