Қазақстанда Жаңа жыл кезінде пойыз бен ұшақ билеттері қымбаттай ма? Жұртты алаңдатқан сауалға Көлік министрлігі жауап берді, деп хабарлайды "Астана" арнасы.
Вице-министр алдағы мейрам кезінде де, кейін де баға өспейді деп уәде берді. Құнын өзгеріссіз қалдыру үшін қосымша вагондар мен әуе рейстері іске қосылады. Тұрғындарға арналған орын саны, әсіресе Алматы, Шымкент, Ақтау бағыты бойынша көбейеді.
"Жалпы билеттер қымбаттамайды. Жолаушылардың елу пайыздан астамы сапарларын алдын ала жоспарлап, билетті ертерек сатып алады, тиісінше олардың бағасы да арзан болады", — дейді Қазақстан көлік вице министрі Мақсат Қалиақпаров.
Еске салсақ, бұған дейін энергетика министрі Ерлан Ақкенженов "Жаңа жылдан кейін Қазақстанда бензин қымбаттай ма" деген сауалға жауап берген болатын.
Мәтіннен қате тапсаңыз, бізге жазыңыз
