Түркияның Мәдениет және туризм министрлігі қолға алған « Түнгі мұражайлар» жобасы биылғы жаз маусымында да жалғасын табады, деп хабарлайды El.kz интернет порталы.
Жоба аясында туристер мен жергілікті тұрғындарға 25 тарихи нысанды кешкі уақытқа дейін тамашалау мүмкіндігі беріледі. Өткен жылы бастау алған бұл бастама 395 мыңнан астам адамның қызығушылығын тудырған болатын.
Атақты Эфес (Измир) пен Иераполис – Памуккале (Денизли) секілді көне шаһарлар арнайы жарықпен жабдықталып, түнгі 23:00-ге дейін жұмыс істейді. Бұл саяхатшыларға тарих пен мәдениетті ерекше атмосферада сезінуге жол ашады. Сонымен қатар, Ыстамбұл мен Анкара қалаларындағы ірі мұражайлар да кешкі уақытқа дейін ашық болады. Мәселен, Галата мұнарасы түнгі 23:00-ге дейін, Аясофия интерактивті мұражайы, Түрік және ислам өнері мұражайы мен Археологиялық мұражайлар 22:00-ге дейін келушілерді қабылдайды. Ал Анадолы өркениеттері мен Этнография мұражайлары Анкарада 21:00-ге дейін ашық болады.
Эгей және Жерорта теңізі жағалауындағы тарихи мекендер де жобадан тыс қалмайды. Бодрумның су асты археология мұражайы, Анталия өңіріндегі Аспендос, Патара және Сиде көне қалалары 22:00-ге дейін келушілерге есігін айқара ашады. Измирдегі Мәдениет және өнер фабрикасы кешкі 21:00-ге дейін жұмыс істейді.
Кападокияның Деринкую, Каймаклы және Өзконак сынды жер асты қалалары да түнгі туризмге бейімделген. Бұл орындар кешкі 21:00-ге дейін қызмет көрсетіп, туристерді тарихи тереңдікке саяхаттауға шақырады. Сондай-ақ, таңды қарсы алуға арналған ерекше бағыт – Немрут тауы (Адыяман) таңғы 4:00 пен 9:00 аралығында жұмыс істейді.
Газиантептегі әйгілі Зеугма мозаика мұражайы, Шанлыурфадағы Гөбеклітепе мен Карахантепе сияқты неолит ескерткіштері және Халеплибахче мозаика мұражайы да 21:00-ге дейін ашық болады. Қаратеңіз жағалауындағы Самсун мұражайы кешкі 22:00-ге дейін, ал Эрзурумдағы мұражай 21:00-ге дейін келушілерді қабылдайды.
«Түнгі мұражайлар» жобасы Түркияның бай тарихи-мәдени мұрасын жаңа қырынан танып-білуге, саяхатшылардың қызығушылығын арттыруға бағытталған тиімді бастама ретінде бағалануда.
