Елімізде көшіп келген қандастар мен көшіп келушілер үшін грант беру мерзімін кемінде 5 жыл тұру шартымен 5 жылға созу, сондай-ақ солтүстік-Шығыс аймақтарына көшіп келген күндізгі бөлімде оқитын отбасы бар студенттерге «шартты жұмыссыз» мәртебесін беру мәселесі қарастырылуы мүмкін. Мұндай ұсынысты «Аманат» партиясының депутаттары Үкімет басшысының атына жолдады, деп хабарлайды Egemen.kz.

«Президент Жолдауында «Еңбек нарығын, әсіресе көші-қон мәселесін реттеу саласында есепке алудың орталықтандырылған жүйесі жоқ» деп атап өткені мәлім. Мемлекет басшысы миграциялық процесстерді мемлекеттік реттеудің тиімділігі төмендігіне де баса назар аударды. Әртүрлі сарапшылардың есебінше, еңбек нарығында 2030 жылы еңбек ресурстарының жетіспеушілігі 1,8 млн адамға жетуі ықтимал! Қазірдің өзінде еліміздің еңбек нарығында әсіресе ауылдық жерлерде, 900-мың маман жетіспейді», дейді депутаттар.

Олардың айтуынша, жағдайды реттеу үшін Үкімет келесі кезек күттірмес қадамдар жасауы тиіс.

- Солтүстік-шығысқа көшіп келгенде тұрғын үйге арналған экономикалық мобильдік сертификатының мөлшерін 2 320 айлық экономикалық көрсеткішке, шамамен 9,1 млн теңге дейін ұлғайту.

- Көшіп келгеннен кейін, азамат үй сатып алуға мемлекеттен алатын көмек мерзімі екі жылға созылып, көшіп кету мерзімі көмек алғаннан бес жылға созу.

- Мемлекеттік қаражат есебінен салынған тұрғын үйді жекешелендіру тәртібін қайта қарастыру.

- Ауыл шаруашылығы, білім беру салаларында мамандарды тартқан жұмыс берушілерге субсидияларды ұлғайту.

- Жұмыс берушілерге Enbek.kz порталында жұмыс пен тұрғын үй туралы ақпаратты жариялау міндетін қатаң сақтау. Жарияламағаны үшін тәртіптік жаза қолдану.

- Көшіп келген қандастар мен көшіп келушілер үшін грант беру мерзімін кемінде 5 жыл тұру шартымен 5 жылға созу.

- Жұмыс берушілерге қоныс аударушылар үшін тұрғын үй сатып алу немесе салуға 2%-дан аспайтын мөлшерлемемен және 20 жылға дейінгі мерзіммен несие беру.

- Солтүстік-Шығыс аймақтарына көшіп келген күндізгі бөлімде оқитын отбасы бар студенттерге «шартты жұмыссыз» мәртебесін беру, оларды квотаға қосу мүмкіндігін қарастыру.

- Шетелде тұратын қандастарды Солтүстік-Шығыс өңірлеріне еңбек күші ретінде тартудың жаңа тетіктерін жасау.