“Қазақстан барысы — 2025” турнирінің жеңімпазы Марат Байқамұров алдағы жоспарларын айтты.
Бұл туралы Caravan.kz медиа порталы хабарлайды. Спортшы “Бірге бір” YouTube арнасына берген сұхбатында “Қазақстан барысы” атануды жасөспірім кезінен армандағанын айтты. ”Қазақстан барысы басталғанда мен 13 жаста болдым. Сол кезден бастап жарысқа қатысып, жеңіске жетуді армандадым. Әкем екеуміз басталғаннан аяғына дейін көріп отыратынбыз. Сол кезде армандап, “мен де осы алтын тұяқты аламын” деп айтатынмын. Ағайларыммен де бірге армандайтынмын. Бірақ, әлі сол күнге жеткеніме сеніп тұрған жоқпын”, — дейді ол. Марат Байқамұров жарыстан алған сыйақысына пәтер алатынын да айтты. “Жеңіс үшін берілетін 15 миллион теңге әлі қолға тиген жоқ. Енді түседі. Бұйырса, ол ақшаның да өзінің орны болып тұр. Шымкент қаласының әкімі пәтер сыйлады. Кілтін күтіп жүрміз. Екі балам бар. Отбасымыз үлкейіп жатыр. Үлкен бір пәтер алсақ па деген арманымыз бар”, — дейді балуан. Сондай-ақ, Марат Байқамұров дзюдодан ұлттық құраманың да мүшесі. Ол қараша айының соңында Абу-Даби қаласында өтетін Grand Slam-ға қатысатынын айтты. ”Алда Абу-Даби қаласында Grand Slam өтеді. Ол мен үшін үлкен дода. Сол жерде топ жарамыз деген үлкен сенімдеміз. Әрбір спортшы мен жаттықтырушының арманы олимпиада шыңын бағындыру ғой. Қай жағынан қарасаң да бәрінің мақсаты бір. Бізде сол мақсаттамыз”, — дейді ол. Еске сала кетейік, биылғы “Қазақстан барысы” сайысына 43 балуан қатысып, жарыстың жүлде қоры 27 миллион теңгені құрады. Турнир 2011 жылдан бастап ұйымдастырылып келеді.
