Денсаулық сақтау министрі Ақмарал Әлназарова ЖРВИ мен тұмаудың маусымдық өсуіне байланысты азаматтарға адамдар көп шоғырланатын орындарға, әсіресе жабық кеңістіктерге баруды шектеуді ұсынды, деп жазады Egemen.kz.
Министрдің айтуынша, халық көп жүретін орындарда тұмау, ЖРВИ және COVID-19-дың алдын алу бойынша жадынамалар, нұсқаулықтар, плакаттар мен бейнематериалдар орналастырылған.
А.Әлназарова қарапайым сақтық шараларын сақтау инфекция жұқтыру қаупін айтарлықтай төмендететінін атап өтті:
- адамдар көп жиналатын орындарға баруды шектеу;
- үй-жайды тұрақты түрде желдету;
- қолды өңдеу үшін антисептик немесе дезинфекциялық сулықтарды қолдану;
- ЖРВИ немесе тұмау белгілері байқалса, балаларды мектепке немесе балабақшаға жібермеу.
Вакцинация және медициналық көмек
«Тұмауға қарсы 2,1 миллион адам егілді. Вакцина қазіргі штамдарға, оның ішінде A H3N2-ге қарсы қорғайды. Маусымдық өршуге орай бастапқы медициналық-санитарлық ұйымдардың жұмысы күшейтілді. 995 мобильді бригада және 1 792 фильтр-кабинет жұмыс істейді, оның 1 097-сі – балалар мен жүкті әйелдерге арналған», деді министр Үкімет отырысында.
Шұғыл медициналық көмек көрсету үшін 1 618 жедел жәрдем бригадасы жұмыс істеп тұр.
Ауруханалардағы жағдай
Стационарлық емдеуге арналған 10 829 төсек-орын дайындалған, оның ішінде екі мыңға жуық резервтік орын бар. Қазіргі таңда 8239 пациент ауруханаға жатқызылған, олардың 6809-ы – балалар. Ел бойынша төсек-орындардың орташа толымдылығы 76% құрайды.
Заттардың жеткілікті қоры бар ма?
Денсаулық сақтау министрлігінің деректеріне сүйенсек, вирусқа қарсы және қызу түсіретін препараттар, қорғаныс құралдары мен дезинфекциялық заттардың жеткілікті қоры қамтамасыз етілген. Мектептер мен балабақшаларда күнделікті мониторинг жүргізіліп, таңғы фильтр ұйымдастырылған, температуралық және дезинфекциялық режим сақталып отыр.
Бұған дейін министр Ақмарал Әлназарова Қазақстандағы ЖРВИ мен тұмау бойынша эпидемиологиялық жағдай, оның ішінде гонконг тұмауының айналымы туралы айтқаны мәлім.
