Астанадағы №3 көпбейінді балалар ауруханасының директоры Марат Әбдуов қаладағы маусымдық ЖРВИ мен тұмау жағдайларының артуына байланысты стационарға түсетін жүктеме едәуір көбейгенін хабарлады.
Оның айтуынша, аурухана бастапқыда 288 төсекке арналған еді. Алайда науқас балалардың саны өскендіктен, төсек қоры 453-ке дейін ұлғайтылды. Оның 243-і — вирустық инфекция жұқтырған балаларды емдеуге бөлінген, деп жазады inbusiness.kz сайты.
Директордың мәліметінше, қабылдау бөліміне тәулігіне 450–500 бала келеді. Солардың тек 20–25 пайызы ғана ауруханаға жатқызуды қажет етеді, қалғандарына үй жағдайында емделу үшін арнайы медициналық ұсынымдар беріледі.
"Қажет болған жағдайда инфекциялық стационар мүмкіндігі 550 төсекке дейін кеңейтілуі мүмкін. Бізде қосымша резервтер бар және дәрі-дәрмекпен толық қамтамасыз етілгенбіз", – деді Марат Әбдуов.
Сондай-ақ ол ата-аналарды қабылдау бөлімінде жиналмауға шақырды, себебі бұл өзге инфекциялармен қосымша жұқтыру қаупін күшейтеді.
Дәрігерлер ауру белгілері байқалған кезде тұрғындарға өз учаскелік дәрігеріне, емханалардағы фильтр-кабинеттерге немесе шұғыл көмек бөлімшелеріне жүгінуді, қажет болса мобильді бригаданы шақыруды ұсынады.
