Алматылық "Қайрат" футбол клубының өкілдері алдағы уақытта Астанада өтетін Чемпиондар лигасының матчтарына билеттер құнының өзгеруіне қатысты пікір білдірді. Бұл туралы клубтың баспасөз қызметіне сілтеме жасаған KAZ.NUR.KZ хабарлайды.
Бұған дейін алматылық клуб УЕФА-ның баға саясатына сәйкес Чемпиондар лигасының жалпы кезеңіндегі өз алаңындағы матчтарға арналған билеттің бағасы бекітілген әрі өзгермейтінін хабарлаған болатын. "Қайраттың" Telegram-каналындағы ақпаратқа сәйкес, бұл баға саясаты Алматыдағы Орталық стадионда өтетін барлық ойынға бекітілгендіктен қайта қаралуы мүмкін болмаған. Енді ойындар өтетін стадион ауысқаннан кейін жағдай да өзгерді.
"Алматыдағы қолайсыз қысқы жағдайларға байланысты матчтарды Астанаға ауыстыру шешімі УЕФА-мен келісе отырып қабылданды. Ойын орнының өзгеруі оған қатысты талаптардың да өзгеруіне әкелді. Жаңа жағдайларды ескере отырып, клубта билет бағасын қайта қарау мүмкіндігі пайда болды", — деп түсіндірді клубтың баспасөз қызметі.
Айта кетейік, бүгін "Қайрат" футбол клубы УЕФА Чемпиондар лигасының негізі кезеңінде өз алаңында өтетін матчтардың Астанада болатынын хабарлаған еді.
Мәтіннен қате тапсаңыз, бізге жазыңыз
