Вице-премьер – ұлттық экономика министрі Серік Жұманғарин Сауда және интеграция министрлігіне азық-түлік тауарларының бағасын тұрақтандыруға қатысты тапсырма берді. Бұл туралы үкіметке сілтеме жасаған KAZ.NUR.KZ хабарлайды.
Үкіметтің баспасөз қызметінің мәліметінше, инфляцияны тұрақтандыру мәселелері бойынша апталық кеңес өткен.
Кеңесте вице-премьер – ұлттық экономика министрі Серік Жұманғарин Сауда және интеграция министрлігіне азық-түлік қоржынына терең талдау жүргізіп, оның құрамына енетін тауарлардың бағасын тұрақтандыруға бағытталған нақты шаралар әзірлеуді тапсырған.
Қараша айының алғашқы екі аптасында Қазақстанда әлеуметтік маңызы бар азық-түлік тауарларының жалпы бағасы 0,1 пайызға өскен. Бірқатар көкөністің бағасы арзандап жатыр. Мысалы, сәбіз 1,7 пайызға, орамжапырақ 1,8 пайызға, пияз 0,4 пайызға арзандаған.
Дегенмен, картоп бағасы өскені байқалған. Оның бағасы соңғы аптада 0,2 пайызға, қарашаның алғашқы екі аптасында 2,2 пайызға көтерілген. Ел бойынша картоптың орташа бағасы – килограмына 188 теңге.
Сауда және интеграция бірінші вице-министрі Айжан Бижанованың мәліметінше, картоптың соңғы 4-5 аптада 4,5 пайызға қымбаттауына экспорттың қайта жандануы әсер еткен.
"Екі айда картоп экспорты 300 мың тоннаны құрады. Ал жақын уақытқа жоспарланған экспорттық келісімшарттар көлемі шамамен 200 мың тонна. Осылайша, біз елдің азық-түлік қауіпсіздігі үшін қауіпсіз болып саналатын 500 мың тонналық жоспарлы шекке жақындап келеміз", — деді Айжан Бижанова.
Вице-премьер Сауда және интеграция министрлігіне картоп қорының жеткілікті көлемін қамтамасыз ету мәселесін Сыртқы саясат және халықаралық экономикалық ұйымдарға қатысу жөніндегі ведомствоаралық комиссияның қарауына енгізуді тапсырды.
Қарашаның екі аптасында тауық жұмыртқасы мен құс етінің бағасы да 0,4 пайызға өскен. Бұған негізінен жем-шөп пен импорттық құрамдас бөліктердің қымбаттауы себеп болып отыр.
Айжан Бижанованың айтуынша, күнбағыс майын өндірушілер құс фабрикаларын жем өндірісіне қажетті арзандатылған май көлемімен қамтамасыз еткен. Бағаны ұстап тұру үшін арзандатылған астық та қажет. Осыған байланысты Серік Жұманғарин Азық-түлік корпорациясына қысқа мерзімде құс фабрикаларын резервтен жемдік астықпен қамтамасыз етуді және ауыл шаруашылығы жәрмеңкелерінде қолжетімді құс етінің көлемін арттыруды тапсырды.
Қарақұмық жармасы қараша айының алғашқы екі аптасында 1,3 пайызға қымбаттағандықтан, Азық-түлік корпорациясына бұл өнімнің қосымша көлемін тұрақтандыру қорларына тікелей сатып алып беру арқылы толықтыру міндеті жүктелген.
"Коммуналдық қызмет тарифтерін өзгерту уақытша тоқтатылған. Қазіргі таңда инфляцияға ықпал етіп отырған және мемлекеттік шаралармен реттеуге болатын негізгі фактор – азық-түлік тауарлары. Бұл тек әлеуметтік маңызы бар өнімдерге ғана емес, азық-түлік қоржынына кіретін әрі мемлекеттік реттеу аясынан тыс қалған барлық тауарға да қатысты.
Сауда және интеграция министрлігі азық-түлік қоржынының құрамына талдау жүргізіп, бағаны тұрақтандыруға бағытталған нақты ұсыныстар әзірлеуі тиіс", — деді Серік Жұманғарин.
Мәтіннен қате тапсаңыз, бізге жазыңыз
