Ел қоржынына тағы 1 алтын түсті. Жапония астанасы Токиода өтіп жатқан ХХV жазғы Сурдлимпиада ойындарының үшінші жарыс күнінде дзюдодан ұлттық құрама мүшелері қарсылас шақ келтірмеді. Жерлестеріміз ақтық сында Франция құрамасын жеңіп, тұғырдың алғашқы сатысынан көрінді. Ал аруларымыз Украинаға есе жіберді. Сөйтіп, күміс жүлдені қанжығаға байлады.
Төрт жылда бір келетін Сурдлимпиада ойындары қазақ дзюдошылары үшін сәтті басталды. Татами шеберлері жарыстың бірінші күнінде ақ қоржынға 4 жүлде салды. Хамзе Ғұлама мен Шадияр Қуандық алтын, Алтынбек Кәкітаев пен Айым Жетпісбаева қола жүлдені еншіледі. Ал байрақты бәсекенің екінші күні Еркебұлан Канафин мен Амина Файзулина қоржынды алтынға толтырды. Айдарбек күміс, Сабиржан Хапизов пен Анна Карморова қолаға қол созды. Қыз-жігіттеріміз командалық сында да жанкүйерін жерге қаратпады.
Фаинаның жеңісі де ел мерейін асқақтатты. Жерлесіміз биіктікке секіруден 1.79 м нәтиже көрсетіп, Сурдлимпиада ойындарының рекордын жаңартты.
Фаина Мейрманова, Сурдлимпиада ойындарының жеңімпазы:
- Бәсекелестік өте жоғары деңгейде өтті. 4 жылда бір келетін жарыс болғандықтан, бәрі жақсы дайындалып келген. Словакия мен Беларусь қызының қарым қабілеті жоғары болды. Бірақ күш жігерімді жинап, өзімді психологиялық тұрғыда дайындадым. Мен өте қуаныштым. Маған жанкүйер болған жандарға алғысымды білдіремін.
Төрткүл дүние көз тіккен Сурдлимпиада додасы 26 қарашаға дейін өтеді. Есту қабілеті зақымданған спортшылар арасындағы байрақты бәсекеге 81 елден 3000-ға жуық спортшы келген. Олар 21 спорт түрінен 209 дисциплинада бақ сынап жатыр. Қазақстан ұлттық құрамасы 78 спортшыдан құралған және 8 спорт түрі бойынша ел намысын қорғайды.
