Екі бельгиялық блогер Луврға өз "экспонатын" кіргізіп, қабырғаға іліп кетті .
Париждегі Лувр мұражайында екі бельгиялық тиктокердің әрекеті көпшіліктің назарын аударды. Daily Star дерегінше, Нил Римери мен Сенне Хавербеке есімді блогерлер әлемдегі ең қорғалған музейлердің біріне өз картиналарын жасырын түрде кіргізіп, "Джоконда" тұрған залға іліп кеткен.
Мұражайға олар қарапайым келуші ретінде кірген.
Ереже бойынша, музейге бөтен өнер туындысын алып кіруге болмайды, алайда тиктокерлер бұл шектеуді айналып өтудің амалын тапқан. Олар рамканы Lego бөлшектерінен жасап, қауіпсіздік тексерісінен өтерде бөлшектеп өткізген, ал картинаны оралған күйінде ішке алып кірген.
Жабылуына бір сағат қалғанда келген блогерлер зал босай бастаған сәтті пайдаланып, картинаны Леонардо да Винчидің "Мона Лизасы" орналасқан бөлмеге іліп қойған. Бұл залда Веронезе, Тинторетто, Тициан секілді XVI ғасыр венециялық шеберлерінің туындылары да қойылған. Бастапқыда олар суретті "Джокондаға" мүмкіндігінше жақын орналастырмақ болған, бірақ бақылаушылар мұрсат бермеген.
Пранк туралы видео әлеуметтік желілерде қызу талқыланып жатыр. Көптеген қолданушы музей қауіпсіздігінің әлсіздігін сынап, "Луврда қорғаныс жүйесін қайта қарау керек" деген пікір білдірді. Басқалары блогерлердің әрекетін "өте күлкілі" деп бағалап, картинаның сапасына да оң пікір қалдырған.
Лувр әкімшілігі әзірге оқиғаға қатысты ресми түсініктеме берген жоқ.
Оқи отырыңыз: Францияда Луврды тонауға қатысы бар тағы бес күдікті ұсталды
