Делиде бокстан Әлем кубогының финалдық кезеңі өтуде.
70 келі салмақ дәрежесінде сынға түскен Нұрбек Мұрсал алғашқы жекпе-жегінде қырғыз боксшысы Ихтияр Нишоновты айқын басымдықпен ұтты. Спортшы енді 19 қарашада өтетін жартылай финалда украиналық Юрий Захариевке қарсы шаршы алаңға шығады және кем дегенде қола медаль алады.
Ал 50 келіде өнер көрсеткен Нұрзат Оңғаров өкінішке қарай жартылай финалға өте алмады. Ол алғашқы кездесуінде жергілікті боксшы Манденгбам Жадуни Сингхпен жұдырықтасып, 5:0 есебімен қарсыласына жол берді.
55 келі салмақта Нұрсұлтан Алтынбек үндістандық Паван Бартуалға 0:5 есебімен жол берді.
75 келі салмақта Аман Қонысбеков өзбекстандық Жавохир Абдурахимовтан 1:4 есебімен ұтылды.
90 келі салмақта Бекзат Таңатар үндістандық Навиин Кумарға есе жіберді.
Сондай-ақ әйелдер арасында Ақбота Болат үндістандық Минкши Минакшиге 0:5 есебімен жеңілді.
Естеріңізге сала кетейік, бұған дейін 80 келіге дейінгі салмақта Санжарәлі Бегалиев оңтүстіккореялық Минсен Кимді жеңіп, жартылай финалға жолдама алған еді. Ол кем дегенде қола медаль алады. 1/2 финалдық кездесу 18 қараша күні Англия боксшысы Тоаред Шиттуға қарсы өтеді.
16-қараша басталған әлем кубогы 18-қарашаға дейін жалғасады. Қазақстандық былғары қолғап шеберлері ерлер арасында сегіз, әйелдер арасында бес салмақ дәрежесінде сынға түсуде.
