Ақнәр Гүлістанның өліміне қатысты қозғалған қылмыстық іс бойынша арнайы жедел-тергеу тобы құрылып, тергеу жұмыстары Ішкі істер министрлігінің ерекше бақылауында. Бұл туралы Мәжіліс кулуарында Ішкі істер министрінің орынбасары Санжар Әділов мәлімдеді, деп хабарлайды Skifnews.kz ақпараттық порталы.
«Сіздер видеоны көрдіңіздер, онда адамның еркін жүргені анық байқалады. Қазіргі уақытта барлық тергеу амалдары толық көлемде жүргізіліп жатыр. Қылмыстық іс менің жеке бақылауымда. Әр апта сайын тергеу барысы бойынша есеп тыңдалып отырады», – деді Санжар Әділов.
Оның айтуынша, оқиғаға байланысты алынған бейнежазбаларға видео-фоноскопиялық сараптама тағайындалған. Сараптама қорытындысы күтілуде.
«Қазір бұл істі тергеу барысында бірқатар куәгерлерден жауап алынды. Тергеу тобы жәбірленуші тараптың барлық дәлелдерін мұқият зерттеп, әрбір уәжді жеке тексеріп жатыр. Кейбір куәгерлер “қорғалуға құқығы бар куә” ретінде жауап беріп жатыр. Неге олар жай куә ретінде жауап бермеді? Себебі олар оқиғадан кейін елден шығып кеткен», – деп түсіндірді ол.
Әділовтің мәліметінше, негізгі қатысушылардың қатысуымен тергеу әрекеттері жалғасып жатыр.
Еске салайық, Ақнәр Гүлістан 2024 жылы шілде айында жетінші қабаттан құлап көз жұмған болатын. Қылмыстық іс "өзін-өзі өлтіруге дейін жеткізу" бабы бойынша тергеліп жатыр. Марқұмның анасы бұл нұсқамен келіспей, қызының өліміне қатысты толыққанды тергеу жүргізуді талап етіп, Президентке дейін үндеу жолдаған.
