Mellstroy.game жарнамасына қатысты Беларусь блогері қамауға санкцияланды.
Қаржылық мониторинг агенттігі Беларусь Республикасының азаматы, Mellstroy лақап атымен танымал блогер Бурим Андрей Александровичты халықаралық іздеуге жариялады, деп хабарлайды ҚМА.
Сот 26 жастағы Буримға қатысты "қамауда ұстау" түріндегі бұлтартпау шарасын санкциялады.
"Ол әлеуметтік желілер арқылы Қазақстан пайдаланушыларын да нысанаға алған онлайн-казино Mellstroy.game платформасын заңсыз ілгерілету мақсатында ауқымды жарнамалық науқан ұйымдастырды деген күдікке ілініп жатыр. Онлайн-казиноны жарнамалау үшін блогер әртүрлі ұтыс ойындары мен челлендждерді жариялаған. Қатысушыларға TikTok, YouTube Shorts және басқа да әлеуметтік желілерде Mellstroy.game атауын, казино логотиптерін және сайт сілтемелерін көрсететін видеолар түсіру ұсынылған", – делінген ҚМА хабарламасында.
Бұған дейін Бурим Ресей Федерациясында тікелей эфир кезінде адамды ұрып-соққаны үшін жауапкершілікке тартылған. Сонымен қатар, 2025 жылғы қараша айында Беларусь Республикасының Минск қалалық соты блогердің барлық платформадағы арналары мен оның логотиптерін экстремистік материалдар деп таныды.
Оқи отырыңыз: 10 млн теңге: Шымкентте шенеуніктен ақша талап еткен блогер ұсталды
