Бүгінде дропперлерді қылмыстық жазаға тартуға құқықтық негіз жоқ.
Мәжіліс "Қазақстан Республикасының кейбір заңнамалық актілеріне Қылмыстық, Қылмыстық-процестік және Қылмыстық-атқару кодекстерін оңтайландыру мәселелері бойынша өзгерістер мен толықтырулар енгізу туралы" заң жобасын екінші оқылымда қабылдады, деп хабарлайды inbusiness.kz сайты.
Заңға сәйкес, қылмыстық процесті оңтайландыру және бюрократиядан арылту мақсатында заң жобасында бірқатар нормалар көзделген. Сондай-ақ, бірқатар түзетулер енгізіліп отыр:
"Мемлекет басшысының тапсырмасын орындау үшін Қылмыстық кодекске жеке адамға қарсы аса қауіпті және ауыр қылмыстар үшін қылмыстық жауаптылықты күшейту бойынша бірқатар түзетулер енгізілді. Өмір бойына бас бостандығынан айыру қолданылмайтын адамдар санаттары кеңейтілді. Некеге тұруға мәжбүрлегені үшін, сондай-ақ "дроперлік" (кибер-алаяқтықты жүзеге асыру мақсатында алаяқтар үшін жалған төлем дроп-карталарын ұсыну) үшін қылмыстық жауаптылық енгізілді. Өздеріне қатысты шартты түрде мерзімінен бұрын босату қолданылуы мүмкін адамдардың тізбесі мүгедектігі бар балаларды тәрбиелеп отырған адамдармен толықтырылды", — делінген Мәжіліс таратқан ақпаратта.
Қолданыстағы заңнамада дропперлерді қылмыстық жауапкершілікке тартуға құқықтық негіз жоқ.
Енді ұсынылған түзетулерде дропперлерді қылмыстық жауапкершілікке тартудың нақты уақыты белгіленеді.
"Бұл ретте жаңа бапта мынадай ескерту бар: осы бапта көзделген қылмыстық құқық бұзушылықты алғаш рет жасаған, ол туралы өз еркімен мәлімдеген, сондай-ақ осы құқық бұзушылықтың ашылуына немесе жолын кесуге белсене қатысқан адам, егер оның әрекеттерінде басқа қылмыстық құқық бұзушылықтың белгілері болмаса, қылмыстық жауаптылықтан босатылады", — делінген хабарламада.
