Өңірде соңғы жылдары қос сәбилі, тіпті үшемді отбасылар саны артқаны байқалған. Бастауыш сыныптан бастап жоғары сыныпқа дейін 16 жұп егіз және сыңар бала оқитын Арыс қаласындағы №32 мектепті тұрғындар «егіздер мектебі» деп атап кеткен, деп жазады Egemen.kz.
Аталған мектепке барған Almaty.tv тілшілерінен мәлім болғандай, кейбір сыныптарда мұғалімдерге де оқушыларды ажырату қиын. Солардың ішінде 11-сынып оқушылары Ондасын мен Нұрсипат көзге түскен.
«Мен боксқа қатысамын. Жиі оқу-жаттығу жиындарына, жарыстарға кетемін. Апам сабақты жақсы оқиды, үй тапсырмасына көмектеседі», дейді Ондасын Асылбеков.
Бұл мектепте бір шаңырақ астында екі буын егіздер оқитын отбасылар да бар. Мысалы, Ақнұр мен Бибінұр – бастауыш сынып оқушылары, ал олардың әпкесі Сара мен ағасы Салман – 8-сыныптың бағдарламасын меңгеріп жүр. Сырт келбеттері ұқсас болғанымен, мінездері бір-біріне мүлде кереғар.
«Мен оқуды жақсы көремін, ал Салман спортқа бейім. Мен ауырсам, ол да өзін жайсыз сезінеді, ал егер ол сырқаттанса – мен де мазасызданамын», дейді Сара мен Салман.
Мұғалімдердің айтуынша, егіз және сыңар балалар командалық рухы жоғары, мейірімді, бір-біріне деген қолдауы ерекше әрі оқу жетістіктері де орташа деңгейден жоғары екен.
«Оларда бауырмалдық сезім айқын. Бір-біріне көмектесуге дайын, мейірімді, ниеттері таза. Жылы жүректі, жанашыр балалар», дейді №32 жалпы орта мектептің директоры Рахима Жүнісова.
