Футболдан 2026 жылғы әлем чемпионатына іріктеу кезеңінің J тобы аясында Қазақстан құрамасы өз алаңында Бельгиямен 1:1 есебімен тең түсті, деп хабарлайды Egemen.kz.
Ойын «Астана Арена» стадионында өтті. Кездесуді Литва елінің төрешісі Донатас Румшас бастаған қазылар алқасы басқарды.
Алғашқы минуттардан-ақ екі команда да жоғары қарқын көрсетіп, қонақтар допты көбірек бақылағанымен, есепті Қазақстан ашты. 9-минутта Дастан Сәтпаев жойқын шабуыл жасап, айып алаңына еніп, жақын бұрышты дәл нысанаға алды — 1:0. Алғашқы таймда Темірлан Анарбеков қақпада сенімді ойнап, бірнеше қауіпті соққыны қайтара білді.
Екінші тайм басталысымен-ақ бельгиялықтар қысымды үдете түсті. 48-минутта Ханс Ванакен жақын қашықтықтан баспен дәл соққы жасап, есепті теңестірді. Одан кейін бельгиялық команда бірнеше шабуыл ұйымдастырды, алайда қазақстандық қақпашы тағы да ерекше шеберлік танытты.
79-минутта Ислам Чесноков Жереми Докуға қарсы ережебұзушылық жасап, қызыл қағаз алды. Қалған минуттарды Қазақстан он ойыншымен өткізді. Соған қарамастан, алаң иелері қорғаныста жинақы ойнап, фаворит саналатын қарсыласқа қарсы тең нәтижені сақтап қалды.
Осылайша, Қазақстан құрамасы іріктеу кезеңін сегіз ұпаймен аяқтап, J тобында төртінші орынға табан тірейді.
